ന്യൂഡൽഹി: ലോക്പാല്‍ സമിതി അംഗം ജസ്റ്റിസ് എ കെ തൃപാഠി കോവിഡ് ബാധിച്ച് മരിച്ചു. ഛത്തീസ്ഗഡ് ഹൈക്കോടതി മുന്‍ ചീഫ് ജസ്റ്റിസാണ് ജസ്റ്റിസ് അജയ് കുമാർ തൃപാഠി (എ കെ തൃപാഠി). 62 വയസ്സായിരുന്നു. ഡൽഹിയിലെ ട്രോമ കെയർ ആശുപത്രിയിൽ വെച്ചാണ് മരണം.

ആരോഗ്യനില വഷളായതിനെ തുടര്‍ന്ന് തീവ്രപരിചരണ വിഭാഗത്തിലായിരുന്നു. ഇദ്ദേഹത്തിന്‍റെ മകൾക്കും വീട്ടുജോലിക്കാരനും കോവിഡ് ബാധിച്ചിരുന്നു. എന്നാൽ ഇവർക്ക് രോ​ഗം ഭേദമായതായാണ് റിപ്പോർട്ട്. ജസ്റ്റിസ് തൃപാഠിക്ക് വാര്‍ധക്യ സഹജമായ അസുഖങ്ങള്‍ ഉണ്ടായതും മരണകാരണമായതായി ആശുപത്രി അധികൃതര്‍ പറയുന്നു.

ജസ്റ്റിസ് തൃപാഠിയുടെ മരണത്തിൽ ലോക്പാൽ സമിതി അധ്യക്ഷൻ ജസ്റ്റിസ് പി സി ഘോഷ്, കേന്ദ്ര നിയമമന്ത്രി രവിശങ്കർ പ്രസാദ് എന്നിവർ അനുശേചിച്ചു. കഴിഞ്ഞവർഷം മാർച്ച് 23 നാണ് ജസ്റ്റിസ് തൃപാഠിയെ ലോക്പാൽ സമിതി അം​ഗമായി നിയമിച്ചത്.