ഭോപ്പാല്‍: പ്രായപൂര്‍ത്തിയാകാത്ത പെണ്‍കുട്ടിയെ വിവാഹം കഴിച്ചതിന് മറ്റൊരു പെണ്‍കുട്ടിക്കെതിരെ പോക്‌സോ നിയമപ്രകാരം കേസെടുത്തു. ഒരു മാസം മുന്‍പാണ് ഇരുവരും ഒളിച്ചോടി പോയി ഒന്നിച്ചു ജീവിക്കാന്‍ ആരംഭിച്ചത്. എന്നാല്‍ ഇവരുടെ ദാമ്പത്യ ജീവിതം ഒരു മാസം മാത്രമേ നീണ്ടു നിന്നുള്ളു.

മധ്യപ്രദേശിലെ ഗുണ ജില്ലയിലാണ് നാടകീയ സംഭവങ്ങള്‍ നടന്നത്. പെണ്‍കുട്ടികള്‍ ഇരുവരും ബന്ധുക്കളാണ്. ഒരു വര്‍ഷത്തോളമായി ഇഷ്ടത്തിലായ ഇരുവരും ഒന്നിച്ചു ജീവിക്കാന്‍ തീരുമാനിക്കുകയായിരുന്നു.

ഇരുവരേയും കാണാനില്ലെന്ന് ബന്ധുക്കള്‍ പരാതി നല്‍കിയിരുന്നു. ഇതിന് പിന്നാലെ പൊലീസ് അന്വേഷണം ആരംഭിച്ചതോടെയാണ് ഇരുവര്‍ക്കും ദാമ്പത്യ ജീവിതം അവസാനിപ്പിക്കേണ്ടി വന്നത്.

ഇരുവരേയും കണ്ടെത്തിയ പൊലീസ് പ്രായപൂര്‍ത്തിയാകാത്ത വധുവായ പെണ്‍കുട്ടിയെ കൗണ്‍സിലിങിന് വിധേയയാക്കി. പ്രായപൂര്‍ത്തിയായ വരനായ പെണ്‍കുട്ടിയെ അറസ്റ്റ് ചെയ്ത് ജയിലിലേക്കും മാറ്റി. പോക്സോ നിയമപ്രകാരമാണ് കേസെടുത്തിരിക്കുന്നത്.

ഒളിച്ചോടുമ്പോള്‍ ഗുണ ജില്ലയിലുള്ള പ്രായപൂര്‍ത്തിയാകാത്ത പെണ്‍കുട്ടി വധുവിന്റെ വേഷത്തിലും പ്രായപൂര്‍ത്തിയായ പെണ്‍കുട്ടി വരന്റെ വേഷത്തിലുമായിരുന്നു. പിന്നീട് പൊലീസ് നടത്തിയ വിശദമായ അന്വേഷണത്തിലാണ് ഇരുവരും താമസിക്കുന്ന സ്ഥലം കണ്ടെത്തിയത്. ഒരു വര്‍ഷത്തോളമായി ഇഷ്ടത്തിലായിരുന്നുവെന്ന് ഇരുവരും പൊലീസിനോട് പറഞ്ഞു.

പ്രായപൂര്‍ത്തിയാകാത്ത പെണ്‍കുട്ടിയെ കൗണ്‍സിലിങിന് വിധേയയാക്കി. പിന്നീട് ബന്ധുക്കള്‍ക്കൊപ്പം വിട്ടയച്ചു.