ന്യൂഡല്ഹി: തേഡ് പാര്ട്ടി മോട്ടോര് ഇന്ഷുറന്സ് പോളിസികളുടെ കാലാവധി ഇന്ന് മുതല് മാറുന്നു. പുതിയ പോളിസിയനുസരിച്ച് ഇരുചക്ര വാഹനങ്ങള് രജിസ്റ്റര് ചെയ്യുമ്പോള് ഇന്ഷുറന്സ് അഞ്ച് വര്ഷത്തേയ്ക്കും കാറുകള്ക്ക് മൂന്ന് വര്ഷത്തേയ്ക്കും ഒരുമിച്ചെടുക്കണം. ഏതുതരം ഇന്ഷുറന്സ് എടുക്കണമെന്നത് ഉപഭോക്താവിന് തീരുമാനിക്കാം. ഒരു കേസില് സുപ്രീം കോടതി പുറപ്പെടുവിച്ച വിധിയുടെ പശ്ചാത്തലത്തിലാണ് കേന്ദ്ര സര്ക്കാരിന്റെ പുതിയ ഉത്തരവ്. ഇതിന് പുറമെ വാഹനം എടുക്കുമ്പോള് തന്നെ ദീര്ഘകാല പോളിസികള് നിര്ബന്ധമായി നല്കാനും ആലോചനയുണ്ട്. രാജ്യത്തെ നിരത്തുകളില് ഓടുന്ന പകുതിയോളം ഇരുചക്ര വാഹനങ്ങള്ക്കും കാറുകള്ക്കും ഇന്ഷുറന്സില്ലെന്ന് സുപ്രീം കോടതി നിയോഗിച്ച റോഡ് സുരക്ഷാ സമിതി കണ്ടെത്തിയതിന്റെ അടിസ്ഥാനത്തിലാണ് പുതിയ നടപടി. തേര്ഡ് പാര്ട്ടി ഇന്ഷുറന്സ് പോളിസിയില്ലാതെ വാഹനം ഓടിക്കുന്നത് 1000 രൂപ പിഴയോ മൂന്ന് വര്ഷം വരെ തടവ് ശിക്ഷയോ ലഭിക്കാവുന്ന കുറ്റമാണ്. പകുതിയോളം ഇരുചക്ര വാഹനങ്ങള്ക്കും കാറുകള്ക്കും ഇന്ഷുറന്സില്ല എന്നത് റോഡ് ഉപയോഗിക്കുന്നവരുടെയെല്ലാം സുരക്ഷയ്ക്ക് വലിയ വെല്ലുവിളിയാണെന്ന നിരീക്ഷണത്തിന്റെ അടിസ്ഥാനത്തില് ആവശ്യമായ നടപടികളെടുക്കാന് പരമോന്നത കോടതി ഐ.ആര്.ഡി.എയെ ചുമതലപ്പെടുത്തുകയായിരുന്നു.
ഇരുചക്ര വാഹനങ്ങള്ക്ക് അഞ്ച് വര്ഷത്തേക്കും കാറുകള്ക്ക് മൂന്ന് വര്ഷത്തേക്കുമുള്ള പോളിസികള് തയ്യാറാക്കാന് കമ്പനികള്ക്ക് ഐ.ആര്.ഡി.എ നിര്ദ്ദേശം നല്കിയിട്ടുണ്ട്. വാഹന ഉടമകള്ക്കും ഇന്ഷുറന്സ് കമ്പനികള്ക്കും ഒരു പോലെ നേട്ടമുണ്ടാക്കുന്നതാണ് പുതിയ തീരുമാനം. എല്ലാ വര്ഷവും ഇന്ഷുറന്സ് പുതുക്കുന്ന ബുദ്ധിമുട്ട് ഒഴിവാകുന്നതിനൊപ്പം കൂടുതല് വാഹനങ്ങള് കൂടുതല് കാലത്തേക്ക് ഇന്ഷുര് ചെയ്യപ്പെടുന്നതോടെ നിരക്കുകള് കുറയുകയും ചെയ്യും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates