ലഖ്‌നൗ : ഉത്തര്‍പ്രദേശ് കോണ്‍ഗ്രസ് സംസ്ഥാന അധ്യക്ഷന്‍ അജയ് കുമാര്‍ ലല്ലു വീട്ടുതടങ്കലില്‍. താന്‍ ഇപ്പോള്‍ വീടിന് പുറത്തിറങ്ങാന്‍ കഴിയാത്ത അവസ്ഥയിലാണെന്ന് അജയ് കുമാര്‍ ലല്ലു പറഞ്ഞു. ഹാഥ് രസില്‍ കൂട്ടബലാല്‍സംഗത്തിന് ഇരയായി കൊല്ലപ്പെട്ട പെണ്‍കുട്ടിയുടെ വീട്ടിലേക്ക് രാഹുലിനൊപ്പം പോകാന്‍ തയ്യാറെടുക്കവെയാണ് യു പി പൊലീസ് ഇദ്ദേഹത്തെ വീട്ടുതടങ്കലിലാക്കിയത്.

വീട് ചുറ്റം കഴിഞ്ഞ രാത്രി മുതല്‍ പൊലീസിന്റെ കനത്ത ബന്തവസ്സിലാണ്. എങ്ങും പോകാന്‍ അനുവദിക്കുന്നില്ല. സുരക്ഷ മുന്‍നിര്‍ത്തിയാണ് നടപടിയെന്നാണ് പൊലീസ് വാദമെന്നും അജയ് കുമാര്‍ ലല്ലു വ്യക്തമാക്കിയതായി ഹിന്ദി മാധ്യമങ്ങള്‍ റിപ്പോര്‍ട്ട് ചെയ്തു.

ഹാഥ് രസ് യുവതിയുടെ കുടുംബാംഗങ്ങളെ കാണുമെന്ന് കോണ്‍ഗ്രസ് നേതാവ് രാഹുല്‍ ഗാന്ധി പറഞ്ഞു. ഒരു ശക്തിക്കും തന്നെ തടയാനാവില്ലെന്നും, കുടുംബാഗങ്ങളെ നേരില്‍ കാണുക തന്നെ ചെയ്യുമെന്നും രാഹുല്‍ വ്യക്തമാക്കി. പെണ്‍കുട്ടിയുടെ കുടുംബാംഗങ്ങളെ കാണുന്നതിനായി രാഹുല്‍ ഹാഥ്‌രസിലേക്ക് തിരിച്ചു. പ്രിയങ്കഗാന്ധി അടക്കമുള്ള നേതാക്കളും രാഹുലിനൊപ്പമുണ്ട്.