നാഗ്പൂര്‍: ഗോമാസം കൈവശം വെച്ചുവെന്നാരോപിച്ച് വീണ്ടും ഗോസംരക്ഷകരുടെ ആക്രമണം. നാഗപൂരില്‍ ഒരാളെ ഒരുകൂട്ടം ഗോസംരക്ഷകര്‍ തല്ലിച്ചതച്ചു. ബുധനാഴ്ച നാഗ്പുരിലെ ഭാര്‍സിങ്കി മേഖലയിലായിരുന്നു സംഭവം. സലിം ഇസ്‌മൈല്‍ ഷാ എന്ന 36കാരനെയാണ് നാലുപേര്‍ ചേര്‍ന്ന് മര്‍ദ്ദിച്ചത്. ഇവര്‍ പ്രഹാര്‍ സംഘടന്‍ എന്ന സംഘടനയിലെ അംഗങ്ങളാണെന്നും പ്രദേശത്തെ എംഎല്‍എയുമായി അടുത്ത ബന്ധമുണ്ടെന്നും അറിയുന്നു. 

ഇരുചക്ര വാഹനത്തില്‍ സഞ്ചരിച്ചിരുന്ന സലിമിനെ സംഘം തടഞ്ഞു നിര്‍ത്തുകയും ഗോമാസം കൈവശം വെച്ചുവെന്നാരോപിച്ച് തല്ലി അവശനാക്കുകയും ആയിരുന്നു. കൈയില്ലുള്ളത് ഗോമാംസം അല്ലെന്ന് സലിം പറഞ്ഞെങ്കിലും സംഘം ഇത് ചെവികൊണ്ടില്ല. 

സംഭവത്തെക്കുറിച്ച് പരാതി ലഭിച്ചുവെന്നും ഇതുമായി ബന്ധപ്പെട്ട് നാല് പേരെ അറസ്റ്റ് ചെയ്തുവെന്നും പൊലീസ് അറിയിച്ചു.സലിമിന്റെ കൈവശമുണ്ടായിരുന്ന മാംസം പരിശോധനക്കായി ഫോറന്‍സിക് ലാബിലേക്ക് അയച്ചു.