ഗുവാഹട്ടി: ഗതാഗത സൗകര്യം ഇല്ലാതിരുന്നതിനെ തുടര്‍ന്ന് അസാമില്‍ യുവാവിന് തന്റെ സഹോദരന്റെ മൃതദേഹം സൈക്കളില്‍ കെട്ടിയിരുത്തി കൊണ്ടുപോകേണ്ടി വന്നു. അസാം മുഖ്യമന്ത്രി സര്‍ബാനന്ദ സോനോവാളിന്റെ മണ്ഡലത്തിലാണ് സംഭവം.

ബ്രഹ്മപുത്രയിലെ മജൗലി ദ്വീപിലേക്ക് കടക്കുന്നതിനായി പാലമില്ലാത്തതിനെ തുടര്‍ന്നാണ് മൃതദേഹം സൈക്കിളില്‍ കൊണ്ടുപോകേണ്ടി വന്നത്. മരിച്ച പതിനെട്ട് വയസുകാരന്റെ മൃതദേഹം സൈക്കിളില്‍ കൊണ്ടുപോകുന്ന ദൃശ്യങ്ങള്‍ പുറത്തുവന്നതോടെ സംഭവത്തെ കുറിച്ച് അന്വേഷിക്കാന്‍ മുഖ്യമന്ത്രി സര്‍ബാനന്ദ സോനോബാള്‍ നിര്‍ദേശം നല്‍കി. 

മജൗലിയെ സംസ്ഥാനത്തെ ആദ്യ വൈഫൈ ജില്ലയാക്കി പ്രഖ്യാപിക്കാനിരിക്കുകയാണ് അസാമിലെ ബിജെപി സര്‍ക്കാര്‍. എന്നാല്‍ ജനങ്ങള്‍ക്ക് അത്യാവശ്യം വേണ്ട ഗതാഗത സൗകര്യം പോലും ഇവിടെ ഒരുക്കാന്‍ തയ്യാറാകാതെയാണ് സമ്പൂര്‍ണ വൈഫൈ ജില്ലയാക്കി പ്രഖ്യാപിക്കാന്‍ പോകുന്നതെന്ന ആരോപണവും ഉയര്‍ന്നിട്ടുണ്ട്.