ന്യൂഡല്‍ഹി: സിബിഎസ്ഇ പത്ത്, പന്ത്രണ്ട് ക്ലാസുകളിലെ ശേഷിച്ച പരീക്ഷകള്‍ പതിനയ്യായിരം കേന്ദ്രങ്ങളിലായി നടത്തുമെന്ന് മാനവ വിഭവശേഷി വകുപ്പു മന്ത്രി രമേശ് പൊഖ്രിയാല്‍. നേരത്തെ മൂവായിരം കേന്ദ്രങ്ങളിലായി പരീക്ഷ നടത്താനായിരുന്നു സിബിഎസ്ഇ തീരുമാനിച്ചിരുന്നത്.

കൊറോണ വൈറസിനെ പ്രതിരോധിക്കുന്നതിനുള്ള ലോക്ക് ഡൗണ്‍ മൂലം മാറ്റിവച്ച പരീക്ഷ ജൂലൈ ഒന്നു മുതല്‍ 15 വരെയാണ് നടത്തുക. സാമൂഹ്യ അകലം ഉറപ്പുവരുത്തുന്നതിനാണ് പരീക്ഷ കൂടുതല്‍ കേന്ദ്രങ്ങളില്‍ നടത്തുന്നതെന്ന് മന്ത്രി പറഞ്ഞു. രാജ്യവ്യാപകമായി 15,000 കേന്ദ്രങ്ങളിലാണ് പരീക്ഷ നടത്തുക. ഇതുവഴി വിദ്യാര്‍ഥികള്‍ കൂടുതല്‍ ദൂരം യാത്ര ചെയ്യുന്നത് ഒഴിവാക്കാനാവുമെന്നും മന്ത്രി അറിയിച്ചു.

വിദ്യാര്‍ഥികള്‍ക്ക് പഠിച്ച സ്‌കൂളുകളില്‍ തന്നെ പരീക്ഷ എഴുതാമെന്ന് നേരത്തെ സിബിഎസ്ഇ പ്രഖ്യാപിച്ചിരുന്നു. എന്നാല്‍ കൊറോണ കണ്ടയ്ന്‍മെന്റ് സോണുകളില്‍ പരീക്ഷാ കേന്ദ്രങ്ങള്‍ ഉണ്ടാവില്ല.