ഹൈദ്രാബാദ്: സ്മാര്‍ട്‌ഫോണ്‍ ആവശ്യപ്പെട്ടപ്പോള്‍ നല്‍കാതിരുന്നതിനെതുടര്‍ന്ന് സുഹൃത്തിനെ കൊന്ന് കത്തിച്ച 19കാരന്‍ അറസ്റ്റില്‍. പ്രേംസാഗര്‍ ആണ് അറസ്റ്റിലായ 19കാരന്‍. പ്രേം എന്ന 17കാരനാണ് കൊല്ലപ്പെട്ടത്. 

ബൈക്കില്‍ ഒരു യാത്ര പോയിവരാം എന്നുപറഞ്ഞാണ് പ്രേംസാഗര്‍ സുഹൃത്തിനെ ഒപ്പം കൂട്ടിയതെന്ന് പൊലീസ് പറഞ്ഞു. ബൈക്കില്‍ ആളൊഴിഞ്ഞ സ്ഥലത്തെത്തിയശേഷം പ്രേമിനെ മര്‍ദ്ദിച്ച് അവശനാക്കുകയായിരുന്നു. ബോധം നഷ്ടപ്പെട്ട് നിലത്തുവിണ പ്രേമിന്റെ ദേഹത്ത് പെട്രോള്‍ ഒഴിച്ച് കത്തിക്കുകയായിരുന്നെന്നാണ് പൊലീസിന്റെ കണ്ടെത്തല്‍. 

ഇരുവരും ഒരേ സ്ഥലത്ത് താമസിക്കുന്നവരാണ്. മുമ്പൊരിക്കല്‍ പ്രേമിന്റെ കൈവശമുണ്ടായിരുന്ന സ്മാര്‍ട്‌ഫോണ്‍ പ്രേംസാഗര്‍ ആവശ്യപ്പെട്ടിരുന്നെന്നും ഇത് നല്‍കാത്തതിന്റെ പകയാണ് കൊലപാതകത്തിലെത്തിയതെന്നും പൊലീസ് പറയുന്നു. മകനെ കാണാനില്ലെന്ന് പറഞ്ഞ് പ്രേമിന്റെ അച്ഛന്‍ നല്‍കിയ പരാതിയില്‍ അന്വേഷണം നടത്തവെയാണ് കൊലപാകം പുറത്തുവന്നത്. ഐപിസി 302,364,201 എന്നീ വകുപ്പുകള്‍ ചുമത്തിയാണ് കെസെടുത്തിട്ടുള്ളത്.