ബാംഗളൂര്‍; രാജ്യത്തെ പ്രമുഖമായ വിനോദ സഞ്ചാര കേന്ദ്രമാണ് ഹംപി. വിജയനഗര സാമ്രാജ്യത്തിന്റെ ബാക്കിപത്രമായി അവശേഷിക്കുന്ന ഹംപിയിലേക്ക് നിരവധി പേരാണ് എത്തുന്നത്. എന്നാല്‍ ഇപ്പോള്‍ സോഷ്യല്‍ മീഡിയയില്‍ വൈറലാകുന്നത് ഹംപിയിലെ പ്രസിദ്ധമായ കല്‍ത്തൂണുകള്‍ തകര്‍ക്കുന്നതിന്റെ വീഡിയോ ആണ്. സ്ഥലത്ത് എത്തിയ യുവാക്കളില്‍ ചിലര്‍ ക്ഷേത്രത്തിന്റെ കല്‍ത്തൂണ് തള്ളി താഴെയിടുന്നതാണ് വീഡിയോയില്‍ കാണുന്നത്. 

വീഡിയോ സോഷ്യല്‍ മീഡിയയില്‍ വൈറലായതോടെ സാമൂഹിക വിരുദ്ധരെ കണ്ടെത്തണം എന്ന ആവശ്യം ശക്തമായിരിക്കുകയാണ്. വിവാദമായതോടെ പൊലീസ് കേസ് എടുത്തിട്ടുണ്ട്. എന്നാല്‍ തൂണുകള്‍ നശിപ്പിക്കുന്നവരെ ഇതുവരെ തിരിച്ചറിഞ്ഞിട്ടില്ല. ഇതിനെ തുടര്‍ന്ന് ഇവരെ കണ്ടെത്താനുള്ള കാമ്പെയ്‌ന് തുടക്കമിട്ടിരിക്കുകയാണ് സോഷ്യല്‍ മീഡിയ. 

സംഗീതം പ്രവഹിക്കുന്ന തൂണുകളുടെ നിര്‍മിതി കൊണ്ട് ഏറെ പ്രശ്തമാണ് ഹംപി. വിറ്റല ക്ഷേത്രത്തിലാണ് തൂണുകളുള്ളത്. ഇതിന്റെ സവിശേഷത ഏറെ പ്രശസ്തമായതിനാല്‍ കാമ്പെയ്‌ന് മികച്ച പിന്തുണയാണ് ലഭിക്കുന്നത്. കര്‍ണാടകയിലെ ബല്ലാരി ജില്ലയില്‍ സ്ഥിതി ചെയ്യുന്ന ഈ പ്രദേശം പണ്ട് വിജയനഗര സാമ്രാജ്യത്തിന്റെ തലസ്ഥാനമായിരുന്നു. ന്യൂയോര്‍ക്ക് ടൈസ് പുറത്ത് വിട്ട ഈ വര്‍ഷം സന്ദര്‍ശിച്ചിരിക്കേണ്ട സ്ഥലങ്ങളുടെ പട്ടികയില്‍ രണ്ടാം സ്ഥാനത്തായിരുന്നു ഹംപി.