തിരുവനന്തപുരം: കിഫ്ബിക്കു പണം കണ്ടെത്തുന്നതിന് മസാല ബോണ്ടുകള്‍ ഇറക്കിയതിനെക്കുറിച്ചു നിയമസഭയില്‍ പ്രത്യേക ചര്‍ച്ച നടക്കും. ഇതു സംബന്ധിച്ച പ്രതിപക്ഷത്തിന്റെ ആവശ്യം സര്‍ക്കാര്‍ അംഗീകരിച്ചു. ഇന്നത്തെ നടപടിക്രമങ്ങളില്‍ ശ്രദ്ധ ക്ഷണിക്കലിനും സബ്മിഷനുകള്‍ക്കും ശേഷം മസാല ബോണ്ട് ഇറക്കിയതിനെക്കുറിച്ചു പ്രത്യേക ചര്‍ച്ചയാവാമെന്ന് സര്‍ക്കാര്‍ അറിയിക്കുകയായിരുന്നു.

മസാല ബോണ്ട് ഇറക്കിയതിനെക്കുറിച്ച് സഭാ നടപടികള്‍ നിര്‍ത്തിവച്ചു ചര്‍ച്ച ചെയ്യണമെന്ന് ആവശ്യപ്പെട്ട് കെഎസ് ശബരീനാഥന്‍ അടിയന്തര പ്രമേയത്തിനു നോട്ടിസ് നല്‍കിയിരുന്നു. ഇതിനുള്ള മറുപടിയിലാണ് പ്രത്യേക ചര്‍ച്ചയാവാമെന്ന് സര്‍ക്കാര്‍ വ്യക്തമാക്കിയത്.

കിഫ്ബിക്കു പണം കണ്ടെത്താന്‍ സര്‍ക്കാര്‍ മസാല ബോണ്ടുകള്‍ ഇറക്കിയതു വിവാദമായിരുന്നു. നേരത്തെ വൈദ്യുതി നവീകരണ കരാറുമായി ബന്ധപ്പെട്ട അഴിമതി ആരോപണം ഉയര്‍ന്ന എസ്എന്‍സി ലാവലിനുമായി ബന്ധമുള്ള കനേഡിയന്‍ കമ്പനിയാണ കിഫ്ബി ബോണ്ടുകള്‍ വാങ്ങിയത്. ഈ ഇടപാടിന്റെ വ്യവസ്ഥകള്‍ ദൂരൂഹമാണെന്നാണ് പ്രതിപക്ഷത്തിന്റെ ആക്ഷേപം. മസാല ബോണ്ടിന്റെ പലിശ അധികമാണെന്നും ഇത് സര്‍ക്കാരിന് അധിക ബാധ്യത വരുത്തിവയ്ക്കുമെന്നും പ്രതിപക്ഷം പറയുന്നു.