കോട്ടയം: ദീപികയുടെ 140-ാം വാര്‍ഷിക പരിപാടിയില്‍ പങ്കെടുക്കാതെ ബിജെപി നേതൃത്വം. പരിപാടിയില്‍ ബിജെപി സെന്‍ട്രല്‍ സോണ്‍ പ്രസിഡന്റ് എന്‍ ഹരിയുടെ പേരുണ്ടായിരുന്നെങ്കിലും ബിജെപി പ്രതിനിധികള്‍ ആരും പങ്കെടുത്തില്ല. എന്നാല്‍ സ്ഥലത്ത് ഇല്ലാത്തതിനാലാണ് പരിപാടിക്കെത്താതിരുന്നതെന്ന് എന്‍ ഹരി പറഞ്ഞു.

ചടങ്ങില്‍ ബിജെപിയെ രാഷ്ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് പരോക്ഷമായി വിമര്‍ശിച്ചു. അഭിപ്രായസ്വാതന്ത്ര്യം ആരുടെ മുന്നിലും അടിയറവ് വെയ്ക്കില്ല. അത് മുഖപ്രസംഗങ്ങള്‍ ശ്രദ്ധിച്ചാല്‍ മനസ്സിലാകും. ദീപിക ആരെയും ഭയപ്പെടില്ല എന്നും അങ്ങനെ ഭയപ്പെടുന്നത് ദൈവത്തെ മാത്രമെന്നും ഫാ. മൈക്കിള്‍ വെട്ടിക്കാട്ട് പറഞ്ഞു. ദീപികയ്ക്കെതിരെ രൂക്ഷവിമര്‍ശനവുമായി ബിജെപി നേതാവ് ഷോണ്‍ ജോര്‍ജ് രംഗത്തെത്തിയ പശ്ചാത്തലത്തിലാണ് ഫാ. മൈക്കിള്‍ വെട്ടിക്കാട്ടിന്റെ പ്രതികരണം.

ദീപികയിലെ ചില വ്യക്തികള്‍ രാഷ്ട്രീയം കളിക്കുകയാണ് എന്നും നിക്ഷേപകര്‍ക്ക് വേണ്ടി വാര്‍ത്തകള്‍ വളച്ചൊടിക്കുകയാണ് എന്നുമാണ് ഷോണ്‍ ജോര്‍ജ് പറഞ്ഞത്. സഭയുടെ മുഖപത്രം സഭയുടെ താത്പര്യങ്ങളാണ് സംരക്ഷിക്കേണ്ടത്. നിക്ഷേപകര്‍ എഡിറ്റോറിയല്‍ പോളിസിയില്‍ ഇടപെടുന്നുണ്ടോ എന്നറിയാന്‍ സഭയുടെ മക്കളായ ഞങ്ങള്‍ക്കെല്ലാം അവകാശമുണ്ട്. സഭയുടെ ആശങ്കകള്‍ എല്ലാം ബിജെപി അംഗീകരിച്ചു. എന്നാല്‍ ദീപികയില്‍ വരുന്നത് കോണ്‍ഗ്രസ് പരസ്യങ്ങളാണ്. പിതാക്കന്മാരുടെ ലേബലില്‍ യുഡിഎഫിന് വേണ്ടി ചിലര്‍ വിടുപണി ചെയ്യുകയാണ്. ദീപിക ഇത് നിര്‍ത്തണമെന്നും ഷോണ്‍ ജോര്‍ജ് പറഞ്ഞിരുന്നു.