തൃശൂര്‍: കോളേജ് വിദ്യാര്‍ത്ഥിനിയെ  ഭീഷണിപ്പെടുത്തി തട്ടിക്കൊണ്ടുപോയ കേസില്‍ പ്രതി പിടിയില്‍. കൈപ്പമംഗലം കാളമുറി വലിയകത്ത് വീട്ടില്‍ നൌഷാദ് (40) നെയാണ് ടൗണ്‍ വെസ്റ്റ് പൊലീസ് അറസ്റ്റ് ചെയ്തത്. 

തൃശൂര്‍ കേരളവര്‍മ്മ കോളജില്‍ പഠിക്കുന്ന വിദ്യാര്‍ത്ഥിനിയെ മൊബൈല്‍ഫോണിലൂടെയാണ് ഇയാള്‍ പരിചയപ്പെട്ടത്.  ഇതിനിടയില്‍ പെണ്‍കുട്ടിയുടെ ചില ഫോട്ടോകള്‍ ഇയാള്‍ കൈവശപ്പെടുത്തിയിരുന്നു. വിവാഹിതനാണെന്നും കുട്ടികളുടെ അച്ഛനാണെന്നുമുള്ള വിവരം മറച്ചുവെച്ച് പെണ്‍കുട്ടിയോട് തന്നെ വിവാഹം കഴിക്കണമെന്ന് ഇയാള്‍ ആവശ്യപ്പെട്ടു. ഇരുവീട്ടുകാരോടും ആലോചിച്ച് അവരുടെ സമ്മതപ്രകാരം വിവാഹം കഴിക്കാമെന്ന് പെണ്‍കുട്ടി പറഞ്ഞപ്പോള്‍ ഇയാള്‍ ഒഴിഞ്ഞുമാറുകയായിരുന്നു. 

തിങ്കളാഴ്ച കേരളവര്‍മ്മ കോളജിലേക്ക് പഠിക്കാനെത്തിയ പെണ്‍കുട്ടിയെ കാണാനില്ലെന്നു കാണിച്ച് പിതാവ് വെസ്റ്റ് പോലീസ് സ്‌റ്റേഷനില്‍ പരാതി നല്‍കി. പോലീസ് നടത്തിയ അന്വേഷണത്തില്‍ നൌഷാദും സ്ഥലം വിട്ടതായി മനസ്സിലാക്കി. മൊബൈല്‍ഫോണ്‍ കേന്ദ്രീകരിച്ച് നടത്തിയ അന്വേഷണത്തില്‍ നൌഷാദിനെ എറണാകുളം ജില്ലയിലെ കാലടി ഭാഗത്ത് നിന്ന് പിടികൂടുകയായിരുന്നു.