മലപ്പുറം: കാലിക്കറ്റ് സർവകലാശാലയിലെ പഠന ബോർഡുകൾ പുനഃസംഘടിപ്പിച്ചതുമായി ബന്ധപ്പെട്ട് രാഷ്ട്രീയ പക്ഷപാതം, ക്രമക്കേടുകൾ, സംഘപരിവാർ ബന്ധമുള്ള അധ്യാപകരുടെ നിയമനം തുടങ്ങിയ ആരോപണങ്ങൾ ശക്തമാകുന്നു. സർവകലാശാലയുടെ അക്കാദമിക് സ്വയംഭരണത്തെ യുഡിഎഫ് നേതൃത്വത്തിലുള്ള സിൻഡിക്കേറ്റ് വിട്ടുവീഴ്ച ചെയ്തെന്ന ആരോപണവുമായി എസ്എഫ്ഐയും ഫ്രറ്റേണിറ്റി മൂവ്മെന്റും രംഗത്തെത്തി.

സംഘപരിവാർ ബന്ധമുള്ളവരെന്ന് ആരോപിക്കപ്പെടുന്ന 32 പേരെ പഠന ബോർഡുകളിൽ ഉൾപ്പെടുത്തിയതും അഫിലിയേറ്റഡ് കോളജുകളിലെ യോഗ്യരായ നിരവധി അധ്യാപകരെ ഒഴിവാക്കിയതുമാണ് വിവാദത്തിന് ആധാരം. തൃശ്ശൂരിൽ രണ്ടുവർഷം മുമ്പ് മരിച്ച അധ്യാപകന്റെ പേര് ഒരു പഠന ബോർഡിൽ ഉൾപ്പെടുത്തിയതും സ്വയംഭരണ കോളജുകൾക്ക് ആനുപാതികമല്ലാത്ത പ്രാതിനിധ്യം നൽകിയെന്ന ആരോപണവും നിയമന നടപടികളെക്കുറിച്ച് ചോദ്യങ്ങളുയർത്തിയിട്ടുണ്ട്.

സർവകലാശാലയുടെ അക്കാദമിക് സമിതികളിൽ സംഘപരിവാർ സ്വാധീനം പ്രതിഫലിക്കുന്നതാണ് നിയമനങ്ങളെന്ന് എസ്എഫ്ഐ ആരോപിച്ചു. പ്രധാനപ്പെട്ട രണ്ട് പഠന ബോർഡുകളുടെ അധ്യക്ഷസ്ഥാനങ്ങൾ ആർഎസ്എസ് ബന്ധമുള്ളവർക്കാണ് ലഭിച്ചതെന്നും ഭാഷാ പഠന ബോർഡുകളിൽ സംഘപരിവാർ ചായ്‌വുള്ള മൂന്ന് പേർ അധ്യക്ഷന്മാരായെന്നും സംഘടന ആരോപിച്ചു.

അനുബന്ധ കോളജുകളിലെ പരിചയസമ്പന്നരായ അധ്യാപകരെ ഒഴിവാക്കി മറ്റ് സർവകലാശാലകളിൽ നിന്നും സ്വാശ്രയ കോളജുകളിൽ നിന്നും ഗസ്റ്റ് അധ്യാപകരിൽ നിന്നും പ്രതിനിധികളെ ഉൾപ്പെടുത്തിയെന്നും എസ്എഫ്ഐ ചൂണ്ടിക്കാട്ടി. ഒരു വനിതാ അധ്യാപികയുടെ പേര് ഒരേ പഠന ബോർഡിൽ രണ്ടുതവണ ഉൾപ്പെടുത്തിയതായും പ്രധാനപ്പെട്ട ബിരുദാനന്തര ബിരുദ പഠന ബോർഡുകളുടെ അധ്യക്ഷസ്ഥാനങ്ങളിൽ വിരമിച്ച അധ്യാപകരെ നിയമിച്ചതായും സംഘടന ആരോപിച്ചു.

“കാലിക്കറ്റ് സർവകലാശാല ബോർഡ് ഓഫ് സ്റ്റഡീസിൽ 32 RSS ക്കാരെ നിയമിച്ച് ഉത്തരവായതിൽ യൂത്ത് കോൺഗ്രസ് സംരക്ഷണ മന്ത്രി റോജി എം ജോൺ മിണ്ടിയിട്ടില്ല. നിയമനം കിട്ടിയത് സംഘപരിവാറുകാർക്ക് ആയതുകൊണ്ട് കോൺഗ്രസ് മന്ത്രിക്കും ലീഗിനും പൊള്ളില്ല . ബോർഡ് ഓഫ് സ്റ്റഡീസ് ചേരുന്ന സ്ഥലത്തിന് മുന്നിലൂടെ SFI ക്കാർ നടന്നു പോയിരുന്നെങ്കിൽ മന്ത്രി റോജി ഇപ്പോൾ ഉറഞ്ഞു തുള്ളിയേനെ. RSS ന് കാലു തിരുമ്മാൻ സർക്കാർ വക ഒരു ഉന്നത വിദ്യാഭ്യാസ മന്ത്രി!“ എസ്എഫ്ഐ സംസ്ഥാന പ്രസിഡന്റ് എം ശിവപ്രസാദ് പറഞ്ഞു.

സംഘപരിവാർ ബന്ധമുള്ള അധ്യാപകരെ ഉൾപ്പെടുത്തിയെന്ന ആരോപണം ഗൗരവകരമാണെന്ന് ഫ്രറ്റേണിറ്റി മൂവ്മെന്റ് സംസ്ഥാന പ്രസിഡന്റ് നഈം ഗഫൂർ പറഞ്ഞു. കോൺഗ്രസ്, മുസ്ലിം ലീഗ്, സിപിഎം, ബിജെപി എന്നിവയുമായി ബന്ധമുള്ളവരെ പരിഗണിച്ചപ്പോൾ സംഘപരിവാറിനെ എതിർക്കുന്ന മറ്റ് രാഷ്ട്രീയ സംഘടനകളുടെ പ്രതിനിധികളെ മാറ്റിനിർത്തിയെന്നും അദ്ദേഹം ആരോപിച്ചു.

“നിയമനങ്ങൾക്ക് സ്വീകരിച്ച മാനദണ്ഡങ്ങൾ എന്താണെന്ന് ഉന്നത വിദ്യാഭ്യാസ മന്ത്രിയും സർവകലാശാലാ അധികൃതരും വ്യക്തമാക്കണം. കഴിഞ്ഞ വർഷം ഈ സംഘടനകളിൽനിന്ന് എത്ര പേർ പഠന ബോർഡുകളിൽ അംഗങ്ങളായിരുന്നുവെന്നും വെളിപ്പെടുത്തണം,” അദ്ദേഹം ആവശ്യപ്പെട്ടു. കോൺഗ്രസ്-മുസ്ലിം ലീഗ് ഭൂരിപക്ഷമുള്ള സിൻഡിക്കേറ്റായതിനാൽ യുഡിഎഫിന് ഉത്തരവാദിത്തത്തിൽനിന്ന് ഒഴിഞ്ഞുമാറാനാകില്ലെന്നും അദ്ദേഹം പറഞ്ഞു.

അതേസമയം, തൃശ്ശൂർ വെമ്പല്ലൂരിലെ എംഇഎസ് അസ്മാബി കോളജിലെ ബോട്ടണി വിഭാഗം അസിസ്റ്റന്റ് പ്രൊഫസറായിരുന്ന, കൊടുങ്ങല്ലൂർ സ്വദേശിയായ അധ്യാപകന്റെ പേര് എൻവയൺമെന്റൽ സയൻസ് ആൻഡ് വാട്ടർ മാനേജ്മെന്റ് പഠന ബോർഡിൽ ഉൾപ്പെടുത്തിയതും വിവാദമായി. അസുഖത്തെത്തുടർന്ന് രണ്ടുവർഷം മുമ്പ് മരിച്ച അധ്യാപകന്റെ പേരാണ് പട്ടികയിലുള്ളത്.

സ്വയംഭരണ കോളജുകൾക്ക് നൽകിയ പ്രാതിനിധ്യവും വിമർശനത്തിന് ഇടയാക്കിയിട്ടുണ്ട്. 93 പഠന ബോർഡുകളിലായി 150-ലധികം അധ്യാപകരെ നിയമിച്ചതിൽ പല ബോർഡുകളിലും സ്വയംഭരണ കോളജുകളിലെ അധ്യാപകർക്ക് ഭൂരിപക്ഷം ലഭിച്ചതായാണ് ആരോപണം. ചില ബോർഡുകളുടെ അധ്യക്ഷസ്ഥാനങ്ങളും ഇവർക്കാണ് ലഭിച്ചത്. സ്വന്തം സിലബസും പരീക്ഷാ സംവിധാനവുമുള്ള സ്വയംഭരണ കോളജുകൾക്ക് ഇത്രയധികം പ്രാതിനിധ്യം നൽകിയത് ആനുപാതികമല്ലെന്നാണ് വിമർശനം.

ട്രാവൽ ആൻഡ് ടൂറിസം പഠന ബോർഡിലെ പത്ത് അംഗങ്ങളിൽ മൂന്ന് പേർ മാത്രമാണ് അഫിലിയേറ്റഡ് കോളജുകളിലെ അധ്യാപകർ. സർവകലാശാലാ സംവിധാനത്തിന് പുറത്തുള്ളയാളാണ് ബോർഡ് അധ്യക്ഷനെന്നും ആരോപണമുണ്ട്. സാധാരണ സിൻഡിക്കേറ്റാണ് പഠന ബോർഡ് അംഗങ്ങളെ തിരഞ്ഞെടുക്കാറുള്ളതെങ്കിലും ഇത്തവണ പട്ടിക വൈസ് ചാൻസലർ നേരിട്ട് തയ്യാറാക്കിയെന്നാണ് മറ്റൊരു ആരോപണം. നിയമന മാനദണ്ഡങ്ങൾ പുറത്തുവിടണമെന്നും പുനഃസംഘടിപ്പിച്ച പഠന ബോർഡുകളുടെ ഘടന സംബന്ധിച്ച വിശദീകരണം നൽകണമെന്നും ആവശ്യപ്പെട്ടുള്ള പ്രതിഷേധം ഇതോടെ ശക്തമായിട്ടുണ്ട്.