തൃശൂർ: ഗുരുവായൂരിൽ വിവാദ ഫ്ലെക്സുമായി എൻഡിഎ സ്ഥാനാർഥി ബി ഗോപാലകൃഷ്ണൻ.1977 മുതലുള്ള ​ഗുരുവായൂരിലെ എംഎൽഎമാരുടെ പേര് പ്രദർശിപ്പിച്ചു കൊണ്ടായിരുന്നു ഫ്ലെക്സ്. 50 വർഷത്തെ അവ​ഗണന, ഇതു മാറണം, മാറ്റത്തിനായി ഒരു വോട്ട് എന്നായിരുന്നു ഫ്ലെക്സിലുള്ളത്.

ഗുരുവായൂരിൽ മുന്നണികൾ മുസ്ലിം സ്ഥാനാർഥികളെ മാത്രമേ നിർത്താറുള്ളുവെന്ന ​ഗോപാലകൃഷ്ണന്റെ പരാമർശം നേരത്തെ വിവാദമായിരുന്നു. വിഷയത്തിൽ തെരഞ്ഞെടുപ്പ് കമ്മീഷൻ സ്വീകരിച്ച നടപടി അറിയിക്കാൻ ഹൈക്കോടതി രണ്ടുമാസം സമയം നൽകിയിട്ടുണ്ട്.

തെരഞ്ഞെടുപ്പ് കമ്മീഷൻ ജില്ലാ കലക്ടറുടെ റിപ്പോർട്ട് തേടി ഗോപാലകൃഷ്ണനെതിരെ കേസെടുക്കാൻ നിർദ്ദേശിക്കുകയും ചെയ്തു. ഇതിന് പിന്നാലെയാണ് വിവാദ ഫ്ലെക്സുമായി ഗോപാലകൃഷ്ണൻ രംഗത്തെത്തിയിരിക്കുന്നത്.