കൊച്ചി; മന്ത്രി ജി സുധാകരനുവേണ്ടി മൃത്യുഞ്ജയഹോമം നടത്തി ബിജെപി നേതാവ്. ബിജെപി ജില്ലാ വൈസ് പ്രസിഡന്റ് എൽ.പി. ജയചന്ദ്രനാണ് കളർകോട് മഹാദേവക്ഷേത്രത്തിൽ വഴിപാട് നടത്തിയത്. മാന്യമായി പൊതുപ്രവർത്തനം നടത്തുന്ന മന്ത്രി ജി. സുധാകരനെ കമ്യൂണിസ്റ്റ് പൊളിറ്റിക്കൽ ക്രിമിനലുകളുടെ ക്രൂരമായ പ്രവൃത്തികളിൽനിന്നു രക്ഷിക്കുന്നതിനുവേണ്ടി, രാഷ്ട്രീയ ധാർമികതയുടെ പേരിലാണ് ഹോമം നടത്തിയതെന്ന് ജയചന്ദ്രൻ പറഞ്ഞു.

തിരുവിതാംകൂർ ദേവസ്വം ബോർഡിന് കീഴിലുള്ള കളർകോട് മഹാദേവ ക്ഷേത്രത്തിൽ 100 രൂപ ചെലവാക്കിയാണ് ഹോമം നടത്തിയത്. അമ്പലപ്പുഴ നിയോജക മണ്ഡലത്തിൽ കഴിഞ്ഞ തവണ ജി സുധാകരനെതിരെ ബിജെപി സ്ഥാനാർത്ഥിയായിരുന്നു ജയചന്ദ്രൻ. ഇതുപോലെ 13 വർഷംമുമ്പ് മുൻ മുഖ്യമന്ത്രി വി.എസ്. അച്യുതാനന്ദനുവേണ്ടിയും വഴിപാടു നടത്തിയിട്ടുണ്ടെന്ന് ജയചന്ദ്രൻ പറഞ്ഞു.