ന്യൂഡല്ഹി: സാങ്കേതിക സര്വകലാശാല വിസി നിയമനം റദ്ദാക്കിയ വിധിക്കെതിരെ മുന് വൈസ് ചാന്സലര് ഡോ. രാജശ്രീ എംഎസ് നല്കിയ പുനപ്പരിശോധനാ ഹര്ജി സുപ്രീം കോടതി തള്ളി. ജസ്റ്റിസുമാരായ എംആര് ഷാ, സിടി രവികുമാര് എന്നിവര് അടങ്ങിയ ബെഞ്ചാണ് പുനപ്പരിശോധനാ ഹര്ജി തള്ളിയത്. നിയമനം റദ്ദാക്കിയ വിധിയില് ഇതുവരെ ലഭിച്ച ശമ്പളവും, മറ്റ് ആനുകൂല്യങ്ങളും സംബന്ധിച്ച് ഒരു നിലപാടും വ്യക്തമാക്കിയിട്ടില്ലെന്ന് പുനപ്പരിശോധന ഹര്ജി തള്ളിക്കൊണ്ടുള്ള ഉത്തരവില് സുപ്രീം കോടതി വ്യക്തമാക്കി. വൈസ് ചാന്സലര് ആയിരുന്ന കാലയളവിലുള്ള പെന്ഷന് രാജശ്രീക്ക് അര്ഹത ഉണ്ടായിരിക്കില്ലെന്നും സുപ്രീം കോടതി വ്യക്തമാക്കി.
രാജശ്രീയുടെ നിയമനം വോയ്ഡ് അബ് ഇനിഷ്യോ എന്നാണ് ബെഞ്ച് നേരത്തെ വിധിച്ചിരുന്നത്. അതിനാല് തന്നെ ഈ സേവനം പെന്ഷന് കണക്കാക്കാന് കഴിയില്ലെന്ന് സുപ്രീം കോടതി വ്യക്തമാക്കി. വിധിക്ക് മുന്കാല പ്രാബല്യം നല്കരുത് എന്നായിരുന്നുപുനപ്പരിശോധന ഹര്ജിയില് രാജശ്രീ ആവശ്യപ്പെട്ടിരുന്നത്. എന്നാല് ഈ ആവശ്യം സുപ്രീം കോടതി അംഗീകരിച്ചില്ല.
വൈസ് ചാന്സലര് സ്ഥാനത്തേക്ക് ഒരാളുടെ പേര് മാത്രം ശുപാര്ശ ചെയ്ത സെലക്ഷന് കമ്മിറ്റിയുടെ നടപടി തെറ്റാണെങ്കില് അതിന് നിരപരാധിയായ താന് ഇരയാകുക ആയിരുന്നുവെന്നും പുനപ്പരിശോധന ഹര്ജിയില് രാജശ്രീ പറഞ്ഞിരുന്നു. നിയമനം റദ്ദാക്കിയ സുപ്രീം കോടതി വിധി സമൂഹത്തിന് മുന്നിലും, സഹപ്രവര്ത്തകര്ക്ക് മുന്നിലും തന്നെ ബഹുമാനത്തോടെ കണ്ടിരുന്ന വിദ്യാര്ത്ഥികള്ക്ക് മുന്നിലും അപമാനിതയയാക്കിയെന്നും ഹര്ജിയില് രാജശ്രീ പറഞ്ഞിരുന്നു.
ഈ വാര്ത്ത കൂടി വായിക്കൂ ഗവര്ണറെ ചാന്സലര് സ്ഥാനത്തുനിന്ന് മാറ്റുന്നതിനുള്ള ബില് നിയമസഭ പാസാക്കി
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates