കൊച്ചി: ഒമ്പത് വയസുകാരിയായ മകളോട് ലൈംഗികാതിക്രമം നടത്തിയ 17കാരനെ പിടികൂടി പൊലീസില്‍ ഏല്‍പ്പിച്ച പിതാവിനെതിരെ കേസെടുത്തെന്ന് പരാതി. 17 കാരനെ മര്‍ദിച്ചെന്ന പരാതിയിലാണ് കേസ്. എന്നാല്‍ പോക്‌സോ കേസ് അട്ടിമറിക്കാനാണ് ശ്രമമെന്നും അതിന്റെ ഭാഗമായാണ് പിതാവിനെതിരെയുള്ള കേസെന്നും ആരോപിച്ച് കോണ്‍ഗ്രസ് കടവന്ത്ര പൊലീസ് സ്റ്റേഷന്‍ ഉപരോധിച്ചു. തിങ്കളാഴ്ച സ്റ്റേഷനില്‍ ഹാജരാകാന്‍ പെണ്‍കുട്ടിയുടെ മാതാപിതാക്കളോട് പൊലീസ് നിര്‍ദേശിച്ചിട്ടുണ്ട്. രണ്ടു കുടുംബവും സിപിഎം അനുഭാവികളാണ്.

കടവന്ത്രയില്‍ ഒക്ടോബര്‍ 25ന് പട്ടാപ്പകലായിരുന്നു സംഭവം. 9 ഉം 7ഉം വയസുള്ള പെണ്‍കുട്ടികള്‍ റോഡിലൂടെ സൈക്കിള്‍ ചവിട്ടുന്നതിനിടെ 17കാരന്‍ ലൈംഗിക അതിക്രമം നടത്തിയെന്നാണ് പരാതി. പെണ്‍കുട്ടി പിതാവിനോട് പരാതി പറഞ്ഞതോടെ സിസി ടിവി ദൃശ്യങ്ങള്‍ പരിശോധിച്ച് പിതാവ് കൗമാരക്കാരനെ പിടികൂടി. തുടര്‍ന്ന് പൊലീസില്‍ ഏല്‍പ്പിക്കുകയായിരുന്നു. എന്നാല്‍ കേസ് പിന്‍വലിക്കണമെന്ന് ആവശ്യപ്പെട്ട് 17 കാരന്റെ ബന്ധുക്കളും ചില സിപിഎം പ്രവര്‍ത്തകരും എത്തിയെന്നും പണം വാഗ്ദാനം ചെയ്‌തെന്നും പെണ്‍കുട്ടിയുടെ ബന്ധുക്കള്‍ ആരോപിക്കുന്നു. എന്നാല്‍ കേസുമായി മുന്നോട്ടു പോകുമെന്ന് പെണ്‍കുട്ടിയുടെ കുടുംബം അറിയിച്ചു. തന്നെ മര്‍ദിച്ചെന്ന് ആരോപിച്ച് 17കാരന്‍ പെണ്‍കുട്ടിയുടെ പിതാവിനെതിരെ പരാതി നല്‍കുകയും പൊലീസ് കേസെടുക്കുകയുമായിരുന്നു. പ്രതിയായ പതിനേഴുകാരനെ പെണ്‍കുട്ടിയുടെ പിതാവ് മര്‍ദിക്കുന്ന സിസി ടിവി ദൃശ്യങ്ങളും ഇതിനിടെ പുറത്തുവന്നു.

17കാരന്‍ സ്വതന്ത്രനായി നടക്കുന്നു. കേസ് ഒരുതരത്തിലും മുന്നോട്ടു പോകുന്നില്ലെന്നായതോടെ സിറ്റി പൊലീസ് കമ്മീഷണര്‍ക്ക് പരാതി നല്‍കുകയായിരുന്നുവെന്നും കുട്ടിയുടെ മാതാവ് പറഞ്ഞു. ഒത്തുതീര്‍പ്പിനു വഴങ്ങാത്ത പിതാവിനെ കള്ളക്കേസില്‍ കുടുക്കി പോക്‌സോ കേസ് അട്ടിമറിക്കാനാണ് ശ്രമമെന്ന് സ്റ്റേഷന്‍ ഉപരോധിച്ചുകൊണ്ട് ഉമ തോമസ് എംഎല്‍എ, ഡിസിസി അധ്യക്ഷന്‍ മുഹമ്മദ് ഷിയാസ് എന്നിവര്‍ ആരോപിച്ചു. 17 കാരനെ മര്‍ദിച്ച പരാതിയും സിസി ടിവി ദൃശ്യങ്ങളും ഉള്ളതിനാല്‍ കുട്ടിയുടെ പിതാവിനെതിരെയുള്ള കേസും നിലനില്‍ക്കുമെന്ന് പൊലീസ് വൃത്തങ്ങള്‍ സൂചിപ്പിച്ചു.