തിരുവനന്തപുരം: ഡല്‍ഹിയില്‍ തനിക്ക് അധിക സുരക്ഷ വേണ്ടെന്ന് മുഖ്യമന്ത്രി വിഡി സതീശന്‍. ഇതിനു പിന്നാലെ മുഖ്യമന്ത്രിയുടെ സുരക്ഷ പിന്‍വലിച്ചുകൊണ്ടുള്ള ഔദ്യോഗിക ഉത്തരവ് ആഭ്യന്തര വകുപ്പ് പുറത്തിറക്കി. ഡല്‍ഹിയില്‍ നിയോഗിച്ചിരുന്ന 16 പൊലീസുകാരെ കേരളത്തിലേക്ക് തിരിച്ചുവിളിച്ചു. രണ്ടു ഡ്രൈവര്‍മാരേയും തിരിച്ചു വിളിച്ചിട്ടുണ്ട്.

വാഹനങ്ങള്‍ കേരളത്തില്‍ എത്തിക്കാനും നിര്‍ദേശം നല്‍കിയിട്ടുണ്ട്. പിണറായി വിജയന്റെ നേതൃത്വത്തിലുള്ള ഇടതുസര്‍ക്കാരിന്റെ കാലത്ത് നിയോഗിച്ച പൊലീസുകാരെയാണ് സര്‍ക്കാര്‍ തിരിച്ചു വിളിച്ചത്. ഡല്‍ഹി സന്ദര്‍ശനങ്ങള്‍ക്കായി പിണറായി കേരള ഹൗസില്‍ ഏര്‍പ്പെടുത്തിയിരുന്ന പ്രത്യേക സുരക്ഷയും വാഹനവ്യൂഹവുമാണ് യുഡിഎഫ് സര്‍ക്കാര്‍ പിന്‍വലിച്ചത്.

തന്റെ സുരക്ഷയ്ക്കായി അധിക വാഹനങ്ങൾ ആവശ്യമില്ലെന്നും, പൈലറ്റ് വാഹനവും ഒരു അകമ്പടി (എസ്കോർട്ട്) വാഹനവും പ്രോട്ടോക്കോൾ പ്രകാരമുള്ള സുരക്ഷയും മാത്രം മതിയെന്നാണ് മുഖ്യമന്ത്രി വി ഡി സതീശൻ പൊലീസിന് നൽകിയിട്ടുള്ള നിർദേശം. അതേസമയം, മുഖ്യമന്ത്രിക്കെതിരായ കരിങ്കൊടി പ്രതിഷേധങ്ങളുടെ പശ്ചാത്തലത്തിൽ സുരക്ഷ വർദ്ധിപ്പിക്കണമെന്ന് ഇന്റലിജൻസ് വിഭാഗം ശുപാർശ ചെയ്തിരുന്നു.

അധികാരം ഒഴിഞ്ഞതിന് പിന്നാലെ, മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന് നൽകിയിരുന്ന Z+ (സെഡ് പ്ലസ്) കാറ്റഗറി സുരക്ഷയും അകമ്പടി വാഹനങ്ങളും ഒഴിവാക്കിയിരുന്നു. മുൻ മുഖ്യമന്ത്രി എന്ന നിലയിലും പ്രതിപക്ഷ നേതാവ് എന്ന നിലയിലും നിലവിൽ അദ്ദേഹത്തിന് Y (വൈ) കാറ്റഗറി സുരക്ഷയാണ് നൽകുന്നത്.