കണ്ണൂർ: പാനൂരിൽ കളിക്കുന്നതിനിടെ സ്റ്റീൽ ബോംബ് പൊട്ടി കുട്ടിക്ക് പരിക്ക്. വടക്കെ പൊയിലൂരിൽ വാടക ക്വാർട്ടേഴ്സിൽ താമസിക്കുന്ന ദമ്പതികളുടെ മകൻ മുഹമ്മദ് ഷഹദി (13) നാണ് പരിക്കേറ്റത്. സംഭവത്തിൽ അന്വേഷണം ആരംഭിച്ചതായി കൊളവല്ലൂർ പൊലീസ് അറിയിച്ചു.

രാഷ്ട്രിയ സംഘർഷ മേഖലയായ കണ്ണൂർ പൊയിലൂരിൽ ആണ് സംഭവം നടന്നത്. പരിക്കേറ്റ കുട്ടിയെ തലശേരി ഇന്ദിരാ ഗാന്ധി സഹകരണ ആശുപത്രിയിലേക്ക് മാറ്റി. നിർമാണത്തിന് ശേഷം സ്റ്റീൽ ബോംബ് ആരെങ്കിലും ഉപേക്ഷിച്ചതാവാം എന്നാണ് പൊലിസിൻ്റെ പ്രാഥമിക നിഗമനം.

പ്രദേശത്ത് പൊലിസ് റെയ്ഡ് നടത്തിയെങ്കിലും മറ്റു ബോംബുകളൊന്നും കണ്ടെത്തിയിട്ടില്ല. നേരത്തെ തെരഞ്ഞെടുപ്പിന് മുൻപ് പാനൂർ മേഖലയിൽ ബോംബുകൾ കണ്ടെത്താനായി വ്യാപക റെയ്ഡ് നടത്തിയിരുന്നു.