തൃശൂര്‍: ഗുരുവായൂര്‍ ക്ഷേത്രത്തിലെ ഈ വര്‍ഷത്തെ തൃപ്പുത്തരി മഹോത്സവം ഇന്ന് (ഞായറാഴ്ച) ഭക്തിസാന്ദ്രമായ ചടങ്ങുകളോടെ നടക്കും. രാവിലെ 8.30 മുതല്‍ 9.30 വരെയുള്ള ശുഭമുഹൂര്‍ത്തത്തിലാണ് തൃപ്പുത്തരി ചടങ്ങുകള്‍ നടക്കുക.

തൃപ്പുത്തരി ദിനത്തില്‍ ഭക്തജനങ്ങള്‍ക്കായി 1200 ലിറ്റര്‍ പുത്തരി പായസമാണ് ക്ഷേത്രത്തില്‍ തയ്യാറാക്കുന്നത്. പായസം കൂടുതല്‍ സ്വാദിഷ്ടമാക്കുന്നതിനായി 2200 കദളിപ്പഴവും 22 കിലോ ശുദ്ധമായ നെയ്യും പ്രത്യേക ചേരുവകളായി ഉപയോഗിക്കും. പുത്തരി പായസത്തിനുള്ള ടിക്കറ്റുകള്‍ ശനിയാഴ്ച വൈകുന്നേരം നാലു മണി മുതല്‍ ക്ഷേത്രത്തിലെ തെക്കേനട ടിക്കറ്റ് കൗണ്ടറില്‍ നിന്നും കൊടുക്കുന്നുണ്ട്.

250 മില്ലിലിറ്റര്‍ പായസത്തിന് 60 രൂപയാണ് നിരക്ക് നിശ്ചയിച്ചിരിക്കുന്നത്. ഒരാള്‍ക്ക് പരമാവധി 120 രൂപയുടെ പായസം വരെ ശീട്ടാക്കാന്‍ സാധിക്കും. പായസം വാങ്ങുന്നതിനുള്ള ഡബ്ബയ്ക്ക് 20 രൂപ അധികം നല്‍കണം. ഇന്ന് ഉച്ചപൂജയ്ക്ക് ശേഷമായിരിക്കും ഭക്തര്‍ക്ക് പ്രസാദ വിതരണം നടത്തുക.