ഗുരുവായൂര്: ഈ വര്ഷത്തെ തൃപ്പുത്തരി ഓഗസ്റ്റ് 30 ഞായറാഴ്ച രാവിലെ 8.30 മുതല് 9.30 മണി വരെയുള്ള മുഹൂര്ത്തത്തില് നടക്കും.. തൃപ്പുത്തരി ദിവസം ഭക്തജനങ്ങള്ക്കായി 1200 ലിറ്റര് പുത്തരി പായസം തയ്യാറാക്കും. പുത്തരി പായസം കൂടുതല് സ്വാദിഷ്ടമാക്കുന്നതിന് 2200 എണ്ണം കദളിപ്പഴവും 22 കിലോ നെയ്യും ഉപയോഗിക്കും.
പുത്തരി പായസം ടിക്കറ്റ് 29-08-2026 ശനിയാഴ്ച വൈകുന്നേരം 4 മണി മുതല് തെക്കേനട ടിക്കറ്റ് കൗണ്ടറില് നിന്നും ലഭിക്കും. 250ml പായസത്തിനു 60 രൂപയാണ് നിരക്ക്.ഒരാള്ക്ക് 120 രൂപയുടെ പായസം ശീട്ട് ആക്കാം. ഡബ്ബയ്ക്ക് 20രൂപ കൂടി നല്കണം.ഉച്ചപൂജക്ക് ശേഷം പ്രസാദം ലഭിക്കും.
ഗുരുവായൂര് ക്ഷേത്രത്തില് ഓഗസ്റ്റ് 30 ന് 356 വിവാഹങ്ങള് ശീട്ടാക്കിയിരിക്കുന്ന സാഹചര്യത്തില് ഭക്തര്ക്ക് തടസ്സമില്ലാതെ ക്ഷേത്ര ദര്ശനത്തിനും വിവാഹ ചടങ്ങുകള് ഭംഗിയായി നടത്തുന്നതിനും പോലീസ് സഹകരണത്തോടെ ക്രമീകരണങ്ങള് ഒരുക്കുമെന്ന് ദേവസ്വം ബോര്ഡ് അറിയിച്ചു. തിരക്ക് കണക്കിലെടുത്ത് ഭക്തജനങ്ങളുടെ സുരക്ഷയ്ക്കായി ക്ഷേത്രത്തിനകത്തും പുറത്തും ക്ഷേത്രനഗരിയിലും അധികം പൊലീസിനെ വിന്യസിക്കും.
വിവാഹങ്ങള് പുലര്ച്ചെ 4 മണി മുതല്; കൂടുതല് മണ്ഡപങ്ങള്
സമയബന്ധിതമായി പൂര്ത്തിയാക്കാന് പുലര്ച്ചെ 4 മണി മുതല് കല്യാണങ്ങള് നടത്തും. താലികെട്ടിനായി 6 മണ്ഡപങ്ങള് സജ്ജമാക്കും. താലികെട്ട് ചടങ്ങ് നിര്വ്വഹിക്കാന് ക്ഷേത്രംകോയ്മമാരെ വിവാഹ മണ്ഡപത്തിലേക്ക് അധികമായി നിയോഗിക്കും. മണ്ഡപത്തിന് സമീപം മംഗളവാദ്യസംഘത്തെയും നിയോഗിക്കും. ക്ഷേത്രംകിഴക്കേ നട പൂര്ണമായും വണ്വേ ആക്കും. ഒരു ദിശയിലേക്ക് മാത്രം ഭക്തരെ കടത്തിവിട്ട് തിരക്ക് നിയന്ത്രിക്കും.
വരനും വധുവുമടങ്ങുന്ന വിവാഹസംഘം നേരത്തെയെത്തി മേല്പുത്തൂര് ആഡിറ്റോറിയത്തിന് തെക്ക് ഭാഗത്തെ പുതിയ നടപ്പന്തലിലെ കൗണ്ടറിലെത്തി ടോക്കണ് വാങ്ങണം. ഇവര്ക്ക് ആ പന്തലില് വിശ്രമിക്കാം.. താലികെട്ട് സമയമാകുമ്പോള്ഇവരെ മേല്പുത്തൂര് ആഡിറ്റോറിയത്തില് പ്രവേശിപ്പിക്കും. തുടര്ന്ന് കിഴക്കേ നടയിലെ മണ്ഡപത്തിലെത്തി ഊഴമെത്തുമ്പോള് വിവാഹ ചടങ്ങ് നടത്താം. കല്യാണം കഴിഞ്ഞാല് വിവാഹ സംഘം ക്ഷേത്രം തെക്കേ നട വഴി മടങ്ങി പോകണം. കിഴക്കേ നടവഴി മടങ്ങാന് അനുവദിക്കില്ല.വധു വരന്മാര്ക്കൊപ്പം ഫോട്ടോഗ്രാഫര്മാര് ഉള്പ്പെടെ 24പേര്ക്കേ മണ്ഡപത്തിന് സമീപം പ്രവേശനം അനുവദിക്കൂ. ചടങ്ങിനെത്തുന്നവരുടെ എണ്ണം വധു -വരന് മാരുടെ കുടുംബാംഗങ്ങള് പരമാവധി നിയന്ത്രിക്കണം.
ദര്ശന ക്രമീകരണം
ദര്ശനത്തിന്നെത്തുന്നവര്ക്കും വിവാഹ ചടങ്ങിനെത്തുന്നവര്ക്കും കരുതലും സഹായവുമൊരുക്കി ജീവനക്കാരുംസെക്യൂരിറ്റി വിഭാഗവും പൊലീസും ഉണ്ടാകും. മഫ്ടിയില് ക്ഷേത്രത്തിനകത്തും പൊലീസിനെ വിന്യസിക്കും. പോക്കറ്റടിക്കാര്, സമൂഹ്യ വിരുദ്ധര് എന്നിവരെ കര്ശനമായി അമര്ച്ച ചെയ്യാന് പൊലീസിന് നിര്ദ്ദേശം നല്കിയിട്ടുണ്ട്
സി സി ടി വി നിരീക്ഷണം
ക്ഷേത്രത്തിനകത്തും പുറത്തും ക്ഷേത്രനഗരിയിലും ഉള്ള സി സി ടി വി ക്യാമറകള് എല്ലാം അടിയന്തിരമായി പ്രവര്ത്തനക്ഷമമാക്കും. 24 മണിക്കൂറുംസി സി ടി വി നിരീക്ഷണം ശക്തമാക്കാന് സുരക്ഷാ ജീവനക്കാരെയും നിയോഗിക്കും. സാമൂഹ്യ വിരുദ്ധ പ്രവര്ത്തനം ശ്രദ്ധയില് പെട്ടാല് കര്ശന നിയമ നടപടി എടുക്കും.
റോഡുകളില് പാര്ക്കിങ്ങ് അനുവദിക്കില്ല
വിവാഹത്തിനും ദര്ശനത്തിനും ഭക്തജന തിരക്ക് പ്രതീക്ഷിക്കുന്നതിനാല് ഗുരുവായൂരിലേക്ക് അനാവശ്യ യാത്ര ഒഴിവാക്കണം. ക്ഷേത്രം ഇന്നര് റിംഗ്, ഔട്ടര് റിങ്ങ് റോഡുകളില് വാഹന പാര്ക്കിങ്ങ് അനുവദിക്കില്ല. പാര്ക്കിങ്ങ് അനുവദനീയ കേന്ദ്രങ്ങളില് മാത്രം. ദേവസ്വം ശ്രീകൃഷ്ണ എച്ച് എസ് എസ് ,ദേവസ്വം ഇംഗ്ലീഷ് മീഡിയം സ്കൂള് മൈതാനങ്ങളില് വാഹനങ്ങള്ക്ക് പാര്ക്ക് ചെയ്യാം. ക്ഷേത്രപരിസരത്ത് ഭക്തജനങ്ങള്ക്ക് യഥേഷ്ടം കുടിവെള്ളം ലഭ്യമാക്കും. അടിയന്തിര സന്ദര്ഭത്തില് ആംബുലന്സ് ഫയര്ഫോഴ്സ് വഴിയൊരുക്കും. ഗുരുവായൂരിലേക്കുള്ള പ്രധാന റോഡ് മാര്ഗ്ഗങ്ങളായ കുന്നംകുളം - ഗുരുവായൂര്, ചൂണ്ടല്- ഗുരുവായൂര്, ചാവക്കാട് - ഗുരുവായൂര് എന്നീ പാതകളുടെ ഓരത്ത് വാഹനങ്ങള് കൂട്ടമായി പാര്ക്ക് ചെയ്യാതിരിക്കാന് യാത്രക്കാര് ശ്രദ്ധിക്കണം. ക്ഷേത്ര ദര്ശനവും വിവാഹ ചടങ്ങുകളും സുഗമമായി നടത്താന് ഭക്തജനങ്ങളുടെ പിന്തുണയും സഹായവും അഭ്യര്ത്ഥിക്കുന്നതായി ദേവസ്വം ചെയര്മാന് എ.വി ഗോപിനാഥ് അറിയിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates