കോഴിക്കോട്; ഹോട്ടലിൽ സ്ത്രീകളുടെ ശുചിമുറിയിൽ ഒളിക്യാമറ സ്ഥാപിച്ചു ദൃശ്യങ്ങൾ പകർത്താൻ ശ്രമിച്ച അതിഥിത്തൊഴിലാളി അറസ്റ്റിൽ. ബംഗാൾ ഉത്തർ ദിനാജ്പുർ ഖൂർഖ സ്വദേശി തുഫൈൽ രാജയാണ്(20) അറസ്റ്റിലായത്. കോഴിക്കോട് ന​ഗരത്തിലെ ഹോട്ടലിലാണ് സംഭവമുണ്ടായത്. 

ഹോട്ടലിൽ എത്തിയ യുവതിയാണ് ജനാലയിൽ പേപ്പറിൽ പൊതിഞ്ഞ നിലയിൽ സ്ഥാപിച്ച ക്യാമറ കണ്ടെത്തിയത്. ഹോട്ടലിൽ വൈകിട്ട് ഭർത്താവിനൊപ്പം എത്തിയ യുവതി ശുചിമുറിയിൽ കയറിയപ്പോഴാണ് വെള്ള പേപ്പർ പൊതിഞ്ഞു വച്ചതു കണ്ടത്. സംശയം തോന്നിയ പേപ്പർ തുറന്നു നോക്കിയപ്പോൾ ഫോൺ ക്യാമറ ഓൺ ചെയ്തു വച്ച നിലയിലായിരുന്നു.

ഫോൺ എടുത്തു വിവരം ഹോട്ടൽ ഉടമയെ അറിയിച്ച യുവതി പൊലീസിൽ പരാതി നൽകി. ഫറോക്ക് ഇൻസ്പെക്ടർ ജി.ബാലചന്ദ്രന്റെ നേതൃത്വത്തിൽ പൊലീസ് ഫോൺ പരിശോധിച്ചു. തൊഴിലാളിയെ ഹോട്ടലിൽ എത്തി കസ്റ്റഡിയിലെടുത്തു. ഒന്നര മാസം മുൻപ് ഹോട്ടലിൽ ജോലിക്കെത്തിയതാണ് യുവാവ്. പ്രതിയെ ഇന്നു കോടതിയിൽ ഹാജരാക്കും.