മലപ്പുറം: കോവിഡ്​ വാക്സിൻ ക്യാമ്പിലെത്തിയ വയോധികന് രണ്ട്​ ഡോസ് ഒരുമിച്ച് കുത്തിവെച്ചതായി പരാതി. കരുളായി പുള്ളിയിൽ സ്‌കൂളിൽ ഞായറാഴ്ച നടന്ന ക്യാമ്പിലായിരുന്നു സംഭവം. മുക്കത്ത് താമസിക്കുന്ന കരുവാടൻ കാസിം (62) ആണ് പരാതിക്കാരൻ. 

കാസിം ഭാര്യ നഫീസയ്ക്കൊപ്പം ഉച്ചക്ക്​ 12ഓടെയാണ് ക്യാമ്പിലെത്തിയത്. ആദ്യമെത്തിയ നഴ്‌സ് ഒരു ഡോസ് വാക്‌സിൻ നൽകിയെന്നും ഇതറിയാതെ തൊട്ടുപിറകെയെത്തിയ മറ്റൊരു നഴ്‌സ് വീണ്ടും കുത്തിവെച്ചെന്നും കാസിം പറഞ്ഞു. എത്ര തവണ കുത്തിവെക്കുമെന്ന് തനിക്ക് അറിയില്ലായിരുന്നെന്നും ഇദ്ദേഹം പറഞ്ഞു.

ഭാര്യക്കും വാക്‌സിൻ നൽകിയ ശേഷം ആരോഗ്യ പ്രവർത്തകർ ഇവരോട്​ പോകാൻ പറഞ്ഞു. എന്നാൽ, ഭർത്താവിന് രണ്ട് തവണ കുത്തിവെച്ചെന്നും തനിക്ക് ഒന്നു മാത്രമേ ലഭിച്ചിട്ടുള്ളൂവെന്നും നഫീസ പറഞ്ഞപ്പോഴാണ് കാസിമിന് രണ്ട്​ ഡോസ് നൽകിയ കാര്യം ആരോഗ്യ പ്രവർത്തകരും അറിഞ്ഞത്.

തുടർന്ന് അര മണിക്കൂർ നിരീക്ഷണത്തിലിരുത്തിയ ശേഷം ആരോഗ്യ പ്രശ്‌നങ്ങളൊന്നുമില്ലാത്തതിനാൽ തിരിച്ചയച്ചു. ആരോഗ്യ പ്രവർത്തകരുടെ അശ്രദ്ധയാണ് ഇത്തരം പ്രശ്നങ്ങൾക്ക് കാരണമാവുന്നതെന്നാണ്​ ആക്ഷേപമുയർന്നത്​.

എന്നാൽ, തങ്ങളുടെ ഭാഗത്തു നിന്നുണ്ടായ വീഴ്ചയല്ല ഇരട്ട വാക്‌സിൻ നൽകാൻ കാരണമായതെന്നും വാക്‌സിനെടുത്തിട്ടും കാസിം അവിടെത്തന്നെ ഇരുന്നതാണ് വീണ്ടും കുത്തിവെക്കാൻ ഇടയാക്കിയതെന്നും കരുളായി മെഡിക്കൽ ഓഫീസർ ഡോ. അനുപമ പറഞ്ഞു.