മലപ്പുറം: കേവലം പത്തു മില്ലിലിറ്റര് ഇന്ത്യന് നിര്മിത വിദേശ മദ്യം കൈവശം വച്ചതിനു യുവാവിനെ അറസ്റ്റ് ചെയ്ത സബ് ഇന്സ്പെക്ടര്ക്ക് കോടതിയുടെ രൂക്ഷ വിമര്ശനം. അബ്കാരി ആക്ട് പ്രകാരം ഒരാള്ക്ക് മൂന്നു ലീറ്റര് വരെ ഇന്ത്യന് നിര്മിത വിദേശമദ്യം കൈവശം വയ്ക്കാമെന്നിരിക്കെ വെറും 10 മില്ലിലീറ്റര് മദ്യം കൈവശം വച്ചതിനു യുവാവിനെ അറസ്റ്റ് ചെയ്ത വളാഞ്ചേരി പൊലീസ് സബ് ഇന്സ്പെക്ടറെയാണ് മഞ്ചേരി ജില്ലാ പ്രിന്സിപ്പല് സെഷന്സ് ജഡ്ജ് രൂക്ഷ ഭാഷയില് വിമര്ശിച്ചത്.
തിരൂര് പൈങ്കണ്ണൂര് വാരിയത്തൊടി ധനേഷി (32)നെയാണ് ഇക്കഴിഞ്ഞ 25ന് അറസ്റ്റ് ചെയ്തത്. തുടര്ന്ന് ഒരാഴ്ചയോളം ധനേഷ് റിമാന്ഡിലായിരുന്നു. ധനേഷിനു ജാമ്യം അനുവദിച്ചു കൊണ്ടു നല്കിയ ഉത്തരവിലാണ് കോടതിയുടെ പരാമര്ശം.
ബാര്ബര് ഷോപ്പ് നടത്തി വരുന്ന ധനേഷ് ഷേവിങ് ലോഷനായി ഉപയോഗിച്ചതായിരിക്കാം ഈ തൊണ്ടി മുതലെന്ന് നിരീക്ഷിച്ച കോടതി സമൂഹത്തിലെ താഴെക്കിടയിലുള്ള യുവാവിനെ അറസ്റ്റ് ചെയ്യുന്നതില് അമിതാവേശം കാണിച്ച എസ്ഐയുടെ ഉദ്ദേശ്യ ശുദ്ധിയില് സംശയം പ്രകടിപ്പിച്ചു.
ഇത്തരമൊരു അറസ്റ്റ് നടന്നിരിക്കുന്നത് ഏതെങ്കിലും ബനാന റിപ്പബ്ലിക്കിലല്ലെന്നും പകരം ലോകത്തിലെ ഏറ്റവും വലിയ ജനാധിപത്യ രാജ്യത്താണെന്നും കോടതി ചൂണ്ടിക്കാട്ടി. അന്വേഷണ ഉദ്യോഗസ്ഥന് സംവേദന ക്ഷമതയുള്ളവനായിരിക്കണമെന്നും ഇക്കാര്യം പൊലീസിലെ ഉന്നതര് പരിശോധിക്കണമെന്നും കോടതി ഉത്തരവില് പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates