കോഴിക്കോട് : കോഴിക്കോട് വന്‍ മയക്കുമരുന്ന് വേട്ട. മൂന്നു കോടിയുടെ ഹാഷിഷ് ഓയില്‍ പിടികൂടി. മയക്കുമരുന്ന് കൊണ്ടുവന്ന ആള്‍ അറസ്റ്റിലായി.കോഴിക്കോട് ഫ്രാന്‍സിസ് റോഡ് സ്വദേശി അന്‍വറാണ് അറസ്റ്റിലായത്. 

മൂന്ന് പൊതികളിലാക്കി ബാഗിലായിരുന്നു ഹാഷിഷ് ഓയില്‍ കൊണ്ടുവന്നത്. രാമനാട്ടുകരയില്‍ ബസില്‍ വന്നിറങ്ങുമ്പോഴാണ് ഫറൂഖ് എക്സൈസ് സംഘം ഇയാളെ പിടികൂടിയത്. രഹസ്യ വിവരത്തിന്‍റെ അടിസ്ഥാനത്തിലായിരുന്നു എക്സൈസിന്‍റെ നീക്കം. 

ആന്ധ്രപ്രദേശിലെ വിജയ വാഡയില്‍ നിന്നാണ് അന്‍വര്‍ ഹാഷിഷ് ഓയിലുമായി എത്തിയത്. ബസില്‍ തന്നെയായിരുന്നു യാത്ര. പെട്ടെന്ന് പിടികൂടാതിരിക്കാനാണ് ബസില്‍ മയക്കുമരുന്ന് കടത്തിയതെന്ന് ഇയാൾ മൊഴി നൽകി.

മുമ്പും  ഇയാള്‍ മയക്കുമരുന്ന് കടത്തിയിട്ടുണ്ട്. ഇത്രയും വലിയ അളവില്‍ കോഴിക്കോട്ട് ഹാഷിഷ് ഓയില്‍ പിടികൂടുന്നത് ആദ്യമായാണെന്ന് എക്സൈസ് അധികൃതര്‍ പറഞ്ഞു.