തൃശൂര്‍: കണ്ണൂര്‍ സര്‍വകലാശാല വൈസ് ചാന്‍സലര്‍ നിയമനത്തില്‍ ചട്ടവിരുദ്ധമായി ഇടപെട്ടു എന്ന ആരോപണത്തില്‍ ഉന്നത വിദ്യഭ്യാസ മന്ത്രി ഡോ.ആര്‍ ബിന്ദുവിനെ കരിങ്കൊടി കാണിക്കാന്‍ ശ്രമിച്ച കെഎസ്‌യു, യൂത്ത് കോണ്‍ഗ്രസ് പ്രവര്‍ത്തകരെ പൊലീസ് അറസ്റ്റ് ചെയ്തുനീക്കി. മന്ത്രി രാജിവെക്കണമെന്നാവശ്യപ്പെട്ടായിരുന്നു കെഎസ്‌യു, യൂത്ത് കോണ്‍ഗ്രസ് പ്രവര്‍ത്തകരുടെ പ്രതിഷേധം. കരിങ്കൊടി പ്രതിഷേധത്തെ തുടര്‍ന്ന് മന്ത്രിയുടെ യാത്ര വഴിമാറ്റി വിടുകയും ചെയ്തു. 

വെള്ളിയാഴ്ച വൈകീട്ട് പടിഞ്ഞാറെ കോട്ടയിലാണ് കെഎസ്‌യു യൂത്ത് കോണ്‍ഗ്രസ് പ്രവര്‍ത്തകര്‍ മന്ത്രിയെ കരിങ്കൊടി കാണിക്കാന്‍ കാത്ത് നിന്നത്. കേരളവര്‍മ്മ കോളജില്‍ സംഘടിപ്പിച്ച പരിപാടിയില്‍ പങ്കെടുക്കാന്‍ എത്തുന്ന മന്ത്രിക്ക് നേരെ പ്രതിഷേധിക്കാനായിരുന്നു കെഎസ്‌യു ജില്ലാ സെക്രട്ടറി വി എസ് ഡേവിഡ്,യൂത്ത് കോണ്‍ഗ്രസ് തൃശൂര്‍ നിയോജകമണ്ഡലം സെക്രട്ടറി വിഷ്ണു വിനോദ്, എന്നിവരുടെ നേതൃത്വത്തില്‍ പ്രവര്‍ത്തകര്‍ കാത്ത് നിന്നത്. 

പ്രതിഷേധമുണ്ടാകുമെന്ന് രഹസ്യാന്വേഷണ വിഭാഗം നല്‍കിയ മുന്നറിയിപ്പിനെ തുടര്‍ന്ന് മന്ത്രിയുടെ വാഹനത്തെ വഴിമാറ്റി പരിപാടി സ്ഥലത്തേക്ക് വിട്ടു. പിന്നീട് വെസ്റ്റ് പൊലീസ് സംഘം പ്രവര്‍ത്തകരെ അറസ്റ്റ് ചെയ്ത് മാറ്റുകയായിരുന്നു.