കൊല്ലം: ട്രെയിൻ യാത്രയ്ക്കിടെ വനിതാ ടിടിഇയെ യാത്രക്കാരൻ ആക്രമിച്ചു. ടിടിഇയുടെ ദൃശ്യം യുവാവ് മൊബൈൽ ഫോണിൽ പകർത്തിയത് ചോദ്യം ചെയ്തപ്പോഴാണ് ആക്രമണം. സംഭവത്തിൽ പാലക്കാട് സ്വദേശി ഉമേഷ്(46) പൊലീസ് കസ്റ്റഡിയിലായി. തിരുവനന്തപുരം സ്വദേശിയായ വനിതാ ടിടിഇക്കാണ് മർദ്ദമേറ്റത്. ഇവരുടെ കൈക്ക് പരുക്കേറ്റു. 

വഞ്ചിനാട് എക്സ്പ്രസ് ട്രെയിനിൽ ഇന്നലെ വൈകിട്ടാണ് സംഭവം. ചിറയിൽകീഴ് പിന്നിട്ടപ്പോഴാണ് ടിക്കറ്റുകൾ പരിശോധിച്ചു വരികയായിരുന്ന ടിടിഇയുടെ ദൃശ്യം യുവാവ് മൊബൈൽ ഫോണിൽ പകർത്തിയത്. ഇതു ശ്രദ്ധയിൽപ്പെട്ട ടിടിഇ ചിത്രം ഡിലീറ്റ് ചെയ്യണമെന്ന് ആവശ്യപ്പെട്ടു. ഇതോടെ ഇരുവരും തമ്മിൽ വാക്കേറ്റമായി. പ്രകോപിതനായ യുവാവ് ടിടിഇയുടെ ഷാളിൽ പിടിച്ച് വലിച്ചു. ചെറുത്തതോടെ മർദ്ദിക്കുകയും വസ്ത്രം കീറുകയും ചെയ്തു. 

മറ്റു യാത്രക്കാർ ഇടപെട്ടാണ് യുവാവിനെ ബലമായി പിടിച്ചു മാറ്റിയത്. കൊല്ലം റെയിൽവേ പൊലീസ് എത്തി ഉമേഷിനെ കസ്റ്ററിയിൽ എടുത്തു.