തൃശൂര്‍:  തൃശൂര്‍ മൃഗശാലയില്‍ പുള്ളിപ്പുലി ചത്തു. 26 വയസുള്ള അപ്പു എന്ന വിളിപ്പേരുള്ള പുള്ളിപ്പുലിയാണ് ചത്തത്. പ്രായാധിക്യത്താല്‍ ഏറെ നാളായി അവശനിലയിലായിരുന്ന പുലിയെ വെള്ളിയാഴ്ച രാവിലെയാണ് ചത്ത നിലയില്‍ കണ്ടെത്തിയത്. 

സാധാരണ നിലയില്‍ 20 വയസ്സാണ് പുള്ളിപ്പുലിയുടെ ആയുസ്സുകണക്കാക്കുന്നത്. അപ്പു ജീവിച്ചത് 26 വയസ്സുവരെയായിരുന്നു. പരുക്കേറ്റ നിലയില്‍ 2007ലാണ് മുകുന്ദപുരം താലൂക്കില്‍ നിന്നും പുലിയെ മൃഗശാലയിലെത്തിച്ചത്. വായില്‍ ഒരു വശത്തെ പല്ലുകള്‍ ഉണ്ടായിരുന്നില്ല. 

തലേന്ന് വരെ ഭക്ഷണം കഴിച്ചിരുന്നതായി മൃഗശാല വെറ്റിറിനറി ഡോക്ടര്‍ ധന്യ പറഞ്ഞു. മൃതദേഹം പോസ്റ്റ്‌മോര്‍ട്ടത്തിനു ശേഷം സംസ്‌കരിക്കും.