ന്യൂഡല്ഹി: സത്യപ്രതിജ്ഞ ചെയ്ത് അധികാരമേറ്റ രണ്ടാം പിണറായി സര്ക്കാരിനെ അഭിനന്ദിച്ച് പ്രധാനമന്ത്രി നരേന്ദ്രമോദി. ട്വിറ്ററിലൂടെയാണ് മോദി അഭിനന്ദനം അറിയിച്ചത്.
17 പുതുമുഖങ്ങളടക്കം 21 അംഗങ്ങളുമായാണ് രണ്ടാം പിണറായി മന്ത്രിസഭയുടെ സത്യപ്രതിജ്ഞാ ചടങ്ങ്. മുഖ്യമന്ത്രിയായി പിണറായി വിജയന് സത്യപ്രതിജ്ഞ ചെയ്തു. സെക്രട്ടേറിയറ്റിനു പിന്നിലെ സെന്ട്രല് സ്റ്റേഡിയത്തില് ഒരുക്കിയ പന്തലില് ഗവര്ണര് ആരിഫ് മുഹമ്മദ് ഖാന് സത്യവാചകം ചൊല്ലിക്കൊടുത്തു. പിന്നാലെ കെ. രാജന്, റോഷി അഗസ്റ്റിന്, കെ. കൃഷ്ണന്കുട്ടി, എ.കെ. ശശീന്ദ്രന്, അഹമ്മദ് ദേവര്കോവില്, ആന്റണി രാജു, വി. അബ്ദുറഹിമാന്, ജി.ആര്. അനില്, കെ.എന്. ബാലഗോപാല്, ആര്. ബിന്ദു, ജെ. ചിഞ്ചുറാണി, എം.വി. ഗോവിന്ദന്, പി.എ. മുഹമ്മദ് റിയാസ്, പി. പ്രസാദ്, കെ. രാധാകൃഷ്ണന്, പി. രാജീവ്, സജി ചെറിയാന്, വി. ശിവന്കുട്ടി, വി.എന്. വാസവന്, വീണാ ജോര്ജ് എന്നിവര് സത്യപ്രതിജ്ഞ ചെയ്തു.
വേദിയില് 140 അടി നീളത്തില് സ്ഥാപിച്ച എല്ഇഡി സ്ക്രീനില് ചടങ്ങിനു മുന്പ് 52 ഗായകരും സംഗീതജ്ഞരും അണിചേരുന്ന നവകേരള ഗീതാഞ്ജലി സംഗീതാവിഷ്കാരം പ്രദര്ശിപ്പിച്ചു. ക്ഷണിക്കപ്പെട്ട അതിഥികള്ക്കു മാത്രമായിരുന്നു ചടങ്ങിലേക്കു പ്രവേശനം. സിപിഎം ജനറല് സെക്രട്ടറി സീതാറാം യച്ചൂരി, സിപിഐ സംസ്ഥാന സെക്രട്ടറി കാനം രാജേന്ദ്രന്, നേതാക്കളായ പന്ന്യന് രവീന്ദ്രന്, ഇ. ചന്ദ്രശേഖരന്, സിപിഎം നേതാക്കളായ ഇ.പി. ജയരാജന്, തോമസ് ഐസക്, ഗുരുരത്നം ജ്ഞാനതപസ്വി, വെള്ളാപ്പള്ളി നടേശന് തുടങ്ങിയവര് അടക്കം രാഷ്ട്രീയ, സാമൂഹിക, സാംസ്കാരിക രംഗത്തെ പ്രമുഖര് പങ്കെടുത്തു.
സത്യപ്രതിജ്ഞയ്ക്കു മുന്നോടിയായി രാവിലെ മുഖ്യമന്ത്രിയും സിപിഎം, സിപിഐ നിയുക്ത മന്ത്രിമാരും ആലപ്പുഴയിലെ വയലാര് രക്തസാക്ഷി മണ്ഡപത്തിലും പുന്നപ്ര വയലാര് രക്തസാക്ഷി സ്മാരകത്തിലും പുഷ്പാര്ച്ചന നടത്തി. ബിജെപി ഇതര സംസ്ഥാനങ്ങളിലെ മുഖ്യമന്ത്രിമാരെ ക്ഷണിച്ചിരുന്നെങ്കിലും കോവിഡ് പ്രതിസന്ധി കാരണം പങ്കെടുക്കില്ലെന്ന് അറിയിച്ചിരുന്നു. ട്രിപ്പിള് ലോക്ഡൗണ് അവഗണിച്ച് ചടങ്ങു വിപുലമാക്കിയതില് പ്രതിഷേധിച്ച് യുഡിഎഫ് എംഎല്എമാരും നേതാക്കളും നേരിട്ടെത്തിയില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates