കോഴിക്കോട്: എറണാകുളം, കോഴിക്കോട് ജില്ലകളില്‍ സിപിഐക്ക് യുവ നേതൃത്വം. എഐവൈഎഫ് സംസ്ഥാന വൈസ് പ്രസിഡന്റും സിപിഐ സംസ്ഥാന കൗണ്‍സില്‍ അംഗവുമായ എന്‍ അരുണ്‍ (41) എറണാകുളം ജില്ലാ സെക്രട്ടറിയായി തെരഞ്ഞെടുക്കപ്പെട്ടു. കോതമംഗലത്തു നടന്ന ജില്ലാ സമ്മേളനമാണ് അരുണിനെ സെക്രട്ടറിയായി തെരഞ്ഞെടുത്തത്. പി.ഗവാസിനെ കോഴിക്കോട് ജില്ലാ സെക്രട്ടറിയായും തെരഞ്ഞെടുത്തു. നിലവില്‍ സിപിഐ ജില്ലാ അസിസ്റ്റന്റ് സെക്രട്ടറിയും ജില്ലാ പഞ്ചായത്ത് വൈസ് പ്രസിഡന്റുമാണ്.

2015 - 2020 കാലയളവില്‍ എറണാകുളം ജില്ലാ പഞ്ചായത്ത് അംഗമായിരുന്നു അരുണ്‍. കഥാകൃത്തും സിനിമ, നാടക, ഡോക്യുമെന്ററി സംവിധായകനുമായ അരുണ്‍ കേരള സംസ്ഥാന ചലച്ചിത്ര അക്കാദമി അംഗമായും പ്രവര്‍ത്തിക്കുന്നു. സിപിഐ മന്ത്രിമര്‍ക്കെതിരെ രൂക്ഷവിമര്‍ശനം ഉയര്‍ന്നു. നവകേരള സദസ് സംബന്ധിച്ച് എറണാകുളം സമ്മേളനത്തില്‍ വിമര്‍ശനമുയര്‍ന്നു. നവകേരള സദസ്സുകള്‍ എല്‍ഡിഎഫിന്റെ പേരില്‍ സിപിഎം സ്‌പോണ്‍സര്‍ പരിപാടിയായി നടന്നുവെന്നായിരുന്നു സമ്മേളന പ്രതിനിധികളുടെ വിമര്‍ശനം.