കൊച്ചി: പി ജി ഡോക്ടർമാർ ഇന്ന് സംസ്ഥാന വ്യാപകമായി ഒ പി ബഹിഷ്‌കരിക്കും. പുതിയ പി ജി പ്രവേശന നടപടികൾ അനിശ്ചിതമായി നീണ്ടുപോകുന്നതിൽ പ്രതിഷേധിച്ചാണ് ബഹിഷ്‌കരണം. ബഹിഷ്‌കരണത്തിൽനിന്ന് അത്യാഹിത വിഭാഗം, ഐസിയു, ലേബർ ഡ്യൂട്ടി തുടങ്ങിയ വിഭാഗങ്ങളെ ഒഴിവാക്കിയിട്ടുണ്ട്. 

ആറു മാസമായി നടക്കാത്ത പി ജി കൗൺസലിങ്​ സുപ്രീംകോടതി നാലാഴ്ചകൂടി നീട്ടിയതിൽ പ്രതിഷേധിച്ച് രാജ്യത്തൊട്ടാകെ മെഡിക്കൽ പി ജി ഡോക്ടർമാർ ഒരാഴ്ചയായി സമരത്തിലാണ്. പുതിയ ബാച്ചി‍ന്റെ കൗൺസലിങ്​ നീണ്ടുപോകുന്നതോടെ ഡോക്ടർമാരുടെ കുറവ് ആശുപത്രി പ്രവർത്തനങ്ങളെ ബാധിക്കും. ഇന്ന് ഡി എം ഇ തലത്തിൽ നടക്കുന്ന ചർച്ചയിൽ തീരുമാനമായില്ലെങ്കിൽ സമരം കൂടുതൽ ശക്തമാക്കുമെന്ന് കേരള മെഡിക്കൽ പി ജി അസോസിയേഷൻ ഭാരവാഹികൾ അറിയിച്ചു.