തിരുവനന്തപുരം: ബിജെപി സംസ്ഥാന അധ്യക്ഷന്‍ കെ സുരേന്ദ്രനെതിരെ പരസ്യമായി വിമര്‍ശനമുയര്‍ത്തി മുതിര്‍ന്ന നേതാവ് പിഎം വേലായുധന്‍. മക്കള്‍ വളര്‍ന്നു നിലയിലെത്തുമ്പോള്‍ വൃദ്ധസദനത്തില്‍ കൊണ്ടിട്ടപോലെയാണ് ഇപ്പോഴത്തെ അവസ്ഥയെന്ന്, മുന്‍ വൈസ് പ്രസിഡന്റു കൂടിയായ വേലായുധന്‍ പറഞ്ഞു. കഴിഞ്ഞ ദിവസം വൈസ് പ്രസിഡന്റ് ശോഭാ സുരേന്ദ്രന്‍ നേതൃത്വത്തിനെതിരെ രംഗത്തുവന്നിരുന്നു. 

സംസ്ഥാന പ്രസിഡന്റ് പദത്തിലേക്ക് സുരേന്ദ്രന് വോട്ട് ചെയ്ത ആളാണ് താനെന്നും തന്നെ സുരേന്ദ്രന്‍ വഞ്ചിച്ചെന്നും വേലായുധന്‍ പറയുന്നു. വിങ്ങിപ്പൊട്ടിക്കൊണ്ടാണ് വേലായുധന്‍ മാധ്യമങ്ങളോടു സംസാരിച്ചത്. 

'മക്കള്‍ വളര്‍ന്ന് അവരൊരു നിലയിലെത്തുമ്പോള്‍ അച്ഛനേയും അമ്മയേയും വൃദ്ധസദനത്തില്‍ കൊണ്ടിട്ട പോലെയാണ് ഇപ്പോഴത്തെ അവസ്ഥ. എന്നെപ്പോലെ ഒട്ടേറെ പേര്‍ വീടുകളിലിരിക്കുകയാണ്. ഈ വിഷമം പറയാന്‍ സംസ്ഥാന അധ്യക്ഷനെ പല തവണ ഫോണില്‍ വിളിച്ചു. അദ്ദേഹം ഫോണെടുത്തില്ല. ഈ നിമിഷം വരെ അദ്ദേഹം തിരിച്ച് വിളിച്ചിട്ടുമില്ല. എന്റെ മണ്ഡലമായ പെരുമ്പാവൂരില്‍ രണ്ടു തവണ സുരേന്ദ്രന്‍ വന്നു പോയിട്ടും എന്നെ കണ്ടിട്ടില്ല. '' -പിഎം വേലായുധന്‍ പറഞ്ഞു.