കൊല്ലം: ഓടിക്കൊണ്ടിരുന്ന കെഎസ്ആർടിസി ബസിൽ വെള്ളിമൂങ്ങ ഇടിച്ചു ചില്ല് തകർന്നു. കൊല്ലം-തിരുമംഗലം ദേശീയപാതയിൽ വച്ചാണ് അപകടമുണ്ടായത്. കൊല്ലത്തുനിന്ന് തെങ്കാശിയിലേക്ക് പോയ ബസിന്റെ മുൻവശത്തെ ചില്ലിൽ വെള്ളിമൂങ്ങ ഇടിക്കുകയായിരുന്നു. രാത്രി എട്ടരയോടെയാണ് സംഭവം. 

‌ദിശതെറ്റി പറക്കുന്നതിനിടയിൽ ബസിന്റെ ചില്ലിൽ മൂങ്ങ ശക്തമായിവന്ന് ഇടിച്ചു. വാഹനത്തിന്റെ പ്രകാശമടിച്ചതോടെ മൂങ്ങയുടെ കാഴ്ചമറഞ്ഞതാകാം അപകടത്തിന് കാരണമെന്നാണ് നി​ഗമനം. ഇടിയുടെ ആഘാതത്തിൽ മൂങ്ങ റോഡരികിൽതന്നെ ചത്തുവീഴുകയായിരുന്നു. ചില്ലിന്റെ മുകൾഭാഗത്ത് കേടുപാടുള്ളതിനാൽ ചില്ല് പൂർണമായും മാറ്റണം. 

വനം വകുപ്പ് ജീവനക്കാരും പൊ‌ലീസും സ്ഥലത്തെത്തിയശേഷമാണ് മേൽനടപടികൾ സ്വീകരിച്ചത്.