തിരുവനന്തപുരം: സംസ്ഥാനത്തെ എസ്എസ്എല്‍സി പരീക്ഷാ ഫല പ്രഖ്യാപനം നീട്ടി. എസ്എസ്എല്‍സി ഫലം മെയ് മൂന്നാം വാരവും ഹയര്‍ സെക്കന്‍ഡറി ഫലം മെയ് 25-നും പ്രഖ്യാപിക്കുമെന്ന് വിദ്യാഭ്യാസ മന്ത്രി വി ശിവന്‍കുട്ടി അറിയിച്ചു. എസ്എസ്എല്‍സി മൂല്യനിര്‍ണ്ണയം ഏപ്രില്‍ 16 മുതല്‍ മെയ് 2 വരെ 72 കേന്ദ്രങ്ങളിലായി നടക്കും. ഹയര്‍ സെക്കണ്ടറി മൂല്യനിര്‍ണ്ണയം 89 ക്യാമ്പുകളിലായി ഏപ്രില്‍ 16 മുതല്‍ ആരംഭിക്കും.

യുദ്ധസാഹചര്യം നിലനില്‍ക്കുന്നതിനാല്‍ യുഎഇയിലെ ഏഴ് കേന്ദ്രങ്ങളിലെ എസ്എസ്എല്‍സി, പ്ലസ് ടു പരീക്ഷകള്‍ റദ്ദാക്കി. എസ്എസ്എല്‍സി വിദ്യാര്‍ഥികളുടേത് മോഡല്‍ പരീക്ഷ, പാദവാര്‍ഷിക പരീക്ഷകള്‍ എന്നിവയുടെ മാര്‍ക്കിന്റെ അടിസ്ഥാനത്തിലും ഹയര്‍ സെക്കന്‍ഡറി വിദ്യാര്‍ത്ഥികളുടേത് ഒന്നാം വര്‍ഷ തിയറി പരീക്ഷാ മാര്‍ക്കിന്റെ അടിസ്ഥാനത്തിലും ഫലം നല്‍കും. ഇതില്‍ തൃപ്തരല്ലാത്തവര്‍ക്ക് മെയ് അവസാനം സേ പരീക്ഷ എഴുതാന്‍ അവസരമുണ്ടാകും.

നിരന്തര മൂല്യനിര്‍ണ്ണയ സ്‌കോറുകള്‍ സ്‌കൂള്‍ നോട്ടീസ് ബോര്‍ഡില്‍ പ്രസിദ്ധീകരിക്കണം. പരാതി പരിഹരിക്കാന്‍ വിവിധ തലങ്ങളില്‍ സമിതികള്‍ രൂപീകരിക്കും. അവധിക്കാല ക്ലാസ്സുകള്‍ പാടില്ലെന്നും സ്‌കൂള്‍ ഫിറ്റ്‌നസ് ഉറപ്പാക്കുന്ന നടപടികള്‍ മെയ് മാസത്തില്‍ പൂര്‍ത്തിയാക്കണമെന്നും മന്ത്രി അറിയിച്ചു. സമഗ്രശിക്ഷാ കേരളം വഴി 1158 കോടി രൂപയുടെ പദ്ധതികള്‍ക്കാണ് അനുമതി നല്‍കിയിരിക്കുന്നത്.