തിരുവനന്തപുരം; സർക്കാർ ജീവനക്കാരിൽ നിന്ന് കഴിഞ്ഞ വർഷം പിടിച്ച ഒരു മാസത്തെ ശമ്പളത്തിന്റെ ആദ്യ ​ഗഡു ഈ മാസം നൽകില്ല. ഈ തുകയുടെ ബിൽ പ്രോസസ് ചെയ്യുന്നിനുള്ള സൗകര്യം ശമ്പള വിതരണ സോഫ്റ്റ്‌വെയറായ സ്പാർക്കിൽ ഇതുവരെ സജ്ജീകരിച്ചിട്ടില്ല. അതിനാൽ ആദ്യ ​ഗഡു ഒഴിവാക്കിക്കൊണ്ടുള്ള ശമ്പളമാകും ഈ മാസം ജീവനക്കാർക്ക് ലഭിക്കുക. 

കഴിഞ്ഞ വർഷം കോവിഡ് വ്യാപനം രൂക്ഷമായതിന് പിന്നാലെയാണ് സർക്കാർ ജീവനക്കാരിൽ നിന്ന് ഒരു മാസത്തെ ശമ്പളം പിടിച്ചത്. നാളെ മുതൽ വിതരണം ചെയ്യുന്ന ശമ്പളത്തിനൊപ്പം പണം തിരികെ നൽകുമെന്നായിരുന്നു സർക്കാർ നൽകിയ വാഗ്ദാനം. എന്നാൽ സോഫ്റ്റ്വെയറിൽ സജീകരിക്കാത്തതിനാൽ ആദ്യ ​ഗഡു ഒഴിവാക്കിക്കൊണ്ടുള്ള ശമ്പളമാണ് ഡിഡിഒമാർ സമർപ്പിച്ചത്.

അതേസമയം, 2019 ജനുവരിക്കും 2021 ഫെബ്രുവരിക്കും ഇടയിൽ വിരമിച്ചവർ, പിഎഫ് അക്കൗണ്ട് ക്ലോസ് ചെയ്തവർ, ഏപ്രിൽ, മേയ് മാസങ്ങളിൽ വിരമിക്കാനിരിക്കുന്നവർ എന്നിവരുടെ ഡിഎ കുടിശിക, ക്ഷാമാശ്വാസ കുടിശിക എന്നിവ ഇൗ മാസത്തെ ശമ്പളത്തിനൊപ്പവും മേയിലെ പെൻഷനൊപ്പവും പണമായി നൽകാൻ ധനവകുപ്പ് സർക്കുലർ ഇറക്കി.