കോട്ടയം: പാമ്പാടിയിലെ ക്രിസ്മസ് കാര്‍ണിവല്‍ കാണാനെത്തുന്നവര്‍ ഒന്നമ്പരക്കും, ഇത് വത്തിക്കാനാണോ എന്ന്. സൗത്ത് പാമ്പാടിയിലെ കൈരളി ആര്‍ട്‌സ് ആന്റ് സ്‌പോര്‍ട്‌സ് ക്ലബിന്റെ നേതൃത്വത്തില്‍ സൗത്ത് പാമ്പാടി വത്തിക്കാന്‍ തോട്ടില്‍ നടക്കുന്ന വത്തിക്കാന്‍ കാര്‍ണിവലിന് തുടക്കമായി.

ശാന്തമായി ഒഴുകുന്ന വത്തിക്കാന്‍ തോടിന്റെ സ്വാഭാവിക പ്രകൃതി ഭംഗിയെ ക്രിസ്മസിനോട് കൂട്ടിയിണക്കിയാണ് കാര്‍ണിവല്‍. തോടിന്റെ മധ്യത്തിലായി പുല്‍ക്കൂട് ഒരുക്കിയിട്ടുണ്ട്. ക്രിസ്മസ് നക്ഷത്രവും സാന്താക്ലോസും കാര്‍ണിവലിന്റെ പ്രധാന ആകര്‍ഷണങ്ങളാണ്. കൂടാതെ ട്രെയിനിലും കലമാനെ പൂട്ടിയ തേരിലും സഞ്ചരിക്കുന്ന സാന്താക്ലോസ് മാതൃകകളടക്കം കാര്‍ണിവലില്‍ കാഴ്ചകളേറെ.

തോട്ടില്‍ അരയന്നങ്ങളുടെ മാതൃകയും സ്ഥാപിച്ചിട്ടുണ്ട്. തോടിന്റെ ഇരുകരയിലും ദീപാലങ്കാരം കൊണ്ട് അലങ്കരിച്ചിട്ടുണ്ട്. ഡിസംബര്‍ 26 വൈകിട്ട് 6 മുതല്‍ രാത്രി പത്തു വരെയാണ് ക്രിസ്മസ് കാഴ്ചകള്‍ കാണാന്‍ കഴിയുക. ഡിസംബര്‍ 26 ന് സമാപനമാണ്. 150ഓളം അംഗങ്ങളുടെ നേതൃത്വത്തിലുള്ള ക്ലബാണ് കാര്‍ണിവലിന് പിന്നില്‍ പ്രവര്‍ത്തിക്കുന്നത്.

'മതങ്ങള്‍ മനുഷ്യരെ വേര്‍തിരിക്കുന്ന മതിലുകളല്ല; ഉദാത്തമായ വിശ്വമാനവികതയാണ് നമ്മുടെ കരുത്ത്'