കൊല്ലം: '' കടലില്‍ വലയിട്ടപ്പോള്‍ ഞാന്‍ കരുതിയത് ഒരുപാടു മത്സ്യം കിട്ടുമെന്നാണ്. പക്ഷേ വല വലിച്ചപ്പോള്‍ കിട്ടിയത് വളരെ കുറച്ചു മീന്‍ മാത്രം. ഇന്നാണ് ഇവരുടെ ജീവിതം നേരില്‍ കണ്ടത്. ഇപ്പോള്‍ എനിക്കതു നേരിട്ടു മനസ്സിലായി.'' മത്സ്യത്തൊഴിലാളികളോടൊപ്പം കടലില്‍ പോയതിന്റെ അനുഭവങ്ങള്‍ പങ്കുവച്ച് രാഹുല്‍ ഗാന്ധി പറഞ്ഞു.

മത്സ്യത്തൊഴിലാളികളെയും അവരുടെ സമൂഹത്തെയും ഏറെ ബഹുമാനിക്കുന്നയാളാണ് താനെന്നു രാഹുല്‍ പറഞ്ഞു. അവരുടെ അധ്വാനത്തെ ആരാധിക്കുന്നു. അവരുടെ പ്രശ്‌നങ്ങള്‍ മനസ്സിലാക്കാനാണ് ഒപ്പം പോയത്. 

കൊല്ലം വാടി ഹാര്‍ബറില്‍ നിന്ന് മത്സ്യ ബന്ധന വള്ളത്തില്‍ മത്സ്യത്തൊഴിലാളികള്‍ക്കൊപ്പമായിരുന്നു രാഹുലിന്റെ കടല്‍യാത്ര. ഒരു മണിക്കൂറോളം കടലില്‍ ചെലവിട്ട് മടങ്ങിയെത്തി.

രാഹുല്‍ ഗാന്ധി ഇന്ന് മത്സ്യത്തൊഴിലാളികളുമായി സംവാദം നടത്തും. രാവിലെ ഒരു മണിക്കൂറാണ് സംവാദം. കൊല്ലം ജില്ലയിലെ വിവിധ മേഖലകളില്‍ നിന്നുള്ള ആയിരത്തോളം മത്സ്യത്തൊഴിലാളികളെ പരിപാടിയിലേക്ക് ക്ഷണിച്ചിട്ടുണ്ട്.