കൊച്ചി: റാപ്പര്‍ വേടന്റെ (ഹിരണ്‍ ദാസ് മുരളി) വിവാഹ ക്ഷണക്കത്ത് വൈറലാകുന്നു. ഫെബ്രുവരി 24 ന് നടക്കുന്ന വിവാഹത്തിന്റെ ക്ഷണക്കത്താണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്.

'ഇന്ത്യന്‍ ഭരണഘടന സാക്ഷിയായി ഞങ്ങള്‍ വിവാഹിതരാകുന്നു' എന്നാണ് ക്ഷണക്കത്തിന്റെ തുടക്കത്തിലുള്ളത്. ആര്‍ഭാടങ്ങള്‍ ഒഴിവാക്കി തികച്ചും ലളിതമായി തയ്യാറാക്കിയ ഈ കുഞ്ഞു കല്യാണക്കുറി ഇതിനോടകം തന്നെ ആരാധകര്‍ക്കിടയില്‍ ചര്‍ച്ചയായിക്കഴിഞ്ഞു. ദീര്‍ഘകാല സുഹൃത്തും എഴുത്തുകാരിയുമായ നവമിയാണ് വധു. പൂര്‍ണമായും രജിസ്റ്റര്‍ വിവാഹമായിട്ടായിരിക്കും ചടങ്ങുകള്‍ നടക്കുക. പ്രശസ്ത സെലിബ്രിറ്റി മേക്കപ്പ് ആര്‍ട്ടിസ്റ്റ് രഞ്ജു രഞ്ജിമാറാണ് കല്യാണക്കുറി പങ്കുവെച്ചത്. ഇരുവരെയും വിവാഹത്തിനായി അണിയിച്ചൊരുക്കുന്നതും രഞ്ജു തന്നെയാണ്.

'എന്ത് ലളിതമായിട്ടാണ് ഈ കല്യാണക്കുറി ചെയ്തിരിക്കുന്നത്. ഒട്ടും തന്നെ ആര്‍ഭാടമില്ലാതെ ഒരു കുഞ്ഞ് കല്യാണക്കുറി. ഒട്ടും ആര്‍ഭാടമില്ലാതെ അവര്‍ കല്യാണം കൊണ്ടാടാന്‍ പോവുകയാണ്. എന്നും എന്നും എന്നും ഒത്തിരി സന്തോഷത്തോടെ നിങ്ങള്‍ക്ക് ജീവിക്കാന്‍ കഴിയട്ടെ,' - രഞ്ജു സോഷ്യല്‍ മീഡിയയില്‍ കുറിച്ചു.