കൊച്ചി: കേരളത്തിൽ സിക വൈറസ് റിപ്പോർട്ട് ചെയ്ത സാഹചര്യത്തിൽ സംസ്ഥാനത്ത് നിന്നുള്ളവർക്ക് ഇ പാസ് നിർബന്ധമാക്കി തമിഴ്നാട്. തമിഴ്നാടിന്റെ ഇ പാസ് ഇല്ലാത്തവരെ വാളയാര്‍, മീനാക്ഷിപുരം, പാറശാല അതിർത്തി കടത്തിവിടില്ല. 

ഇന്നലെ സംസ്ഥാനത്ത് ഒരാൾക്ക് കൂടി സിക്ക വൈറസ് സ്ഥിരീകരിച്ചതോടെ കേരളത്തിൽ 15 പേർക്കാണ് രോ​ഗം സ്ഥിരീകരിച്ചിരിക്കുന്നത്. ജില്ലയിലെ ലാബുകളോട് സിക്ക സംശയമുള്ള കേസുകൾ റിപ്പോർട്ട് ചെയ്യാൻ ജില്ലാ ഭരണകൂടം നിർദ്ദേശം നൽകിയിട്ടുണ്ട്. 

കോവിഡ് പ്രതിരോധത്തിന്റെ ഭാഗമായി തമിഴ്‌നാട്ടിൽ ഏർപ്പെടുത്തിയ ലോക്ക്ഡൗൺ ഈ മാസം 19 വരെ നീട്ടി. ഏതാനും ഇളവുകളോടെയാണ് ലോക്ക്ഡൗൺ നീട്ടി ഉത്തരവിറക്കിയത്. കടകൾക്ക് ഇനി മുതൽ 9 മണി വരെ പ്രവർത്തിക്കാം. റസ്റ്ററന്റുകൾ, ചായക്കടകൾ, ബേക്കറികൾ, തട്ടുകടകൾ എന്നിവയ്ക്ക് പകുതി ആളുകളെ പ്രവേശിപ്പിച്ച് ഒൻപതു മണി വരെ തുറക്കാം. അന്തർ സംസ്ഥാന ബസുകൾ തുടങ്ങിയിട്ടില്ലെങ്കിലും പോണ്ടിച്ചേരിയിലേക്കു സർവീസ് തുടങ്ങുമെന്നും സർക്കാർ അറിയിച്ചു.