തിരുവനന്തപുരം: ഒറ്റക്കണ്ണിന്റെ കാഴ്ചയുടെ സഹായത്തോടെ ഏഷ്യയിലെ 48 രാജ്യങ്ങളുടെ പതാകകൾ കല്ലുകളിൽ വരച്ച്  ശരൺ. കൈ വെള്ളയിൽ ഒതുങ്ങുന്ന കല്ലുകകളെയാണ് ശരൺ ക്യാൻവാസാക്കി മാറ്റിയത്. പതാകകൾ 4 x 3 സെ.മി അളവുകളിൽ തുടർച്ചയായ 10 മണിക്കൂർ കൊണ്ട് ശരൺ വരച്ചു തീർത്തു. ഇന്ത്യ ബുക്ക് ഓഫ് റെക്കോർഡിലും ഏഷ്യ ബുക്ക് ഓഫ് റെക്കോർഡിലും ഈ നേട്ടം ശരണിന് സ്ഥാനം നൽകി. ഇനി ഗിന്നസ് ബുക്കിൽ ഇടം നേടുക എന്നതാണ്  ഈ 27 കാരന്റെ ലക്ഷ്യം. 

കുട്ടിക്കാലം മുതൽക്കേ ചിത്രരചനയിൽ കഴിവു തെളിയിച്ച ശരണിന് സഹപാഠിയുടെ കൈപ്പിഴ മൂലമാണ് ഒരു കണ്ണിന് കാഴ്ച നഷ്ടപ്പെട്ടത്. ശുചീകരണ ജോലിക്കിടെ സഹപാഠിയുടെ കയ്യിലിരുന്ന കത്തി യാദൃശ്ചികമായി ശരണിൻൻറെ ഇടത്  കണ്ണിൽ  തറച്ചു. 2006 ഒക്ടോബർ 13നായിരുന്നു ആ സംഭവം. ഇതോടെ ഇടതു കണ്ണിൻറെ കാഴ്ച പൂർണമായി നഷ്ടപ്പെട്ടു. 

ചൊവ്വള്ളൂർ പ്ലാക്കോട് "ശംഖൊലി"യിൽ ഗോപകുമാർ - വിജയശ്രീ ദമ്പതികളുടെ മകനാണ് ശരൺ. ജില്ലാ വിദ്യാഭ്യാസ ഓഫീസ് ജീവനക്കാരനാണ് ഇദ്ദേഹം. മ്യൂറൽ പെയിൻറിംഗ്, പെൻസിൽ ഡ്രോയിംഗ്, ആബ്സ്ട്രാക്ട് പെയിൻറിംഗ്,  ഡൂഡിൽ ആർട്ട്, ഓയിൽ പെയിൻറിംഗ്, വാട്ടർ കളർ എന്നിങ്ങനെ  ശരൺ കഴിവു തെളിയിച്ച് വരയുടെ ലോകം വിശാലമാണ്.