നിലമ്പൂര്‍ ഉപതെരഞ്ഞെടുപ്പിന്റെ വോട്ടെടുപ്പ് പുരോഗമിക്കുന്നു. യുഡിഎഫ് സ്ഥാനാര്‍ത്ഥി ആര്യാടന്‍ ഷൗക്കത്തും എല്‍ഡിഎഫ് സ്ഥാനാര്‍ത്ഥി എം സ്വരാജും രാവിലെ തന്നെ വോട്ടു രേഖപ്പെടുത്തി. സംസ്ഥാനത്ത് ഇന്നും മഴ തുടരും. ഇറാനെ ആക്രമിക്കാനുള്ള പദ്ധതിക്ക് ട്രംപ് അംഗീകാരം നല്‍കിയതായും റിപ്പോര്‍ട്ട്. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം

നിലമ്പൂർ ഉപതെരഞ്ഞെടുപ്പിന്റെ വോട്ടെടുപ്പ് തുടരുന്നു. രാവിലെ മുതൽ പോളിങ് ബൂത്തുകളിൽ നീണ്ട ക്യൂവാണ്. എൽഡിഎഫ്-യുഡിഎഫ് സ്ഥാനാർത്ഥികൾ രാവിലെ വോട്ടു രേഖപ്പെടുത്തി. നിലമ്പൂർ ആയിഷ മുക്കട്ട എൽപി സ്കൂളിൽ വോട്ടുചെയ്തു. ആകെ 10 സ്ഥാനാർത്ഥികളാണ് ജനവിധി തേടുന്നത്.

ഇറാന്‍ - ഇസ്രയേല്‍ സംഘര്‍ഷം തുടരുന്നതിനിടെ ഇറാനില്‍ നിന്നും ഒഴിപ്പിച്ച ഇന്ത്യന്‍ പൗരന്മാരുമായി ആദ്യ വിമാനം ഇന്ത്യയിലെത്തി. 110 പേരുമായാണ് 'ഓപ്പറേഷന്‍ സിന്ധു' എന്നു പേരിട്ട ദൗത്യത്തിലെ ആദ്യ സംഘം ഡല്‍ഹിയിലെത്തിയത്. അര്‍മേനിയയിലെ യെരേവനില്‍ നിന്നാണ് ഇന്ത്യന്‍ പൗരന്മാരെ രാജ്യത്തെത്തിച്ചത്.

ഇറാനെ ആക്രമിക്കാനുള്ള സൈനിക പദ്ധതികള്‍ക്ക് അംഗീകാരം നല്‍കിയിരുന്നുവെന്ന് യു എസ് പ്രസിഡന്റ് ഡോണള്‍ഡ് ട്രംപ്. എന്നാല്‍ സൈനിക നടപടിക്ക് അന്തിമ ഉത്തരവ് നല്‍കിയിട്ടില്ല. ആണവപദ്ധതിയില്‍ നിന്നും പിന്മാറാന്‍ അവസാനനിമിഷം ഇറാന് ഒരവസരം കൂടി നല്‍കുകയായിരുന്നുവെന്ന് ട്രംപ് വ്യക്തമാക്കി.

കേരളത്തില്‍ വീണ്ടും കാട്ടാന ആക്രമണത്തില്‍ മരണം. പാലക്കാട് മുണ്ടൂരില്‍ ആണ് കാട്ടാനയുടെ ആക്രമണത്തില്‍ അറുപത്തിയൊന്ന് കാരന്‍ മരിച്ചത്. മൂണ്ടൂര്‍ ഞാറക്കോട് സ്വദേശി കുമാരനാണ് മരിച്ചത്.

സംസ്ഥാനത്ത് ഇന്നും ഒറ്റപ്പെട്ട ശക്തമായ മഴയ്ക്ക് സാധ്യത. കേരളത്തിലെ ഏഴു ജില്ലകളില്‍ അതിശക്ത മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പിന്റെ മുന്നറിയിപ്പ്