മറയൂർ: ശമ്പളം നൽകിയില്ലെന്ന് ആരോപിച്ച് തൊഴിലാളി കരാറുകാരന്റെ പല്ലിടിച്ച് കൊഴിച്ചു. ടൈൽ പണി ചെയ്തതിന്റെ ശമ്പളം നൽകിയില്ലെന്ന് പറഞ്ഞ് പുതുവൈപ്പ് സ്വദേശി അരുൺ(29)ആണ് കരാറുകാരനെ മർദിച്ചത്.

മൂന്നാർ പഞ്ചായത്തിൽ ലക്കം കോളനി സ്വദേശി രമേശ് കണ്ണൻ(36) ആണ് പരിക്കേറ്റത്. ഇയാളുടെ മുൻനിരയിലെ നാല് പല്ലുകളാണ് നഷ്ടപ്പെട്ടു. അഞ്ചാമതൊന്ന് ഇളകിയിരിക്കുകയാണ്. സംഭവത്തിൽ അരുണിനെ മറയൂർ പോലീസ് അറസ്റ്റ് ചെയ്തു. 

പണിയെടുത്തതിന്റെ 10,000 രൂപ രമേശ് കണ്ണൻ തരാനുണ്ട് എന്നു പറഞ്ഞാണ് തർക്കമുണ്ടായത്. പിന്നാലെ കയ്യാങ്കളിയിലെത്തി. പരിക്കേറ്റ രമേശിനെ സ്വകാര്യ ആശുപത്രിയിൽ പ്രവേശിപ്പിച്ചു.