മലപ്പുറം : കുഞ്ഞനുജന്‍ പഠിക്കുന്ന സര്‍ക്കാര്‍ സ്‌കൂളിന് കംപ്യൂട്ടര്‍ ലാബ് വിവാഹ സമ്മാനമായി നല്‍കി സഹോദരങ്ങള്‍. മലപ്പുറം കാളികാവ്, പൂങ്ങോടിലെ നീലേങ്ങാടന്‍ റഷീദിന്റെ മക്കളായ റിസ്‌വാനും ഷൈമയുമാണ്, വേറിട്ട വിവാഹസമ്മാനവുമായി സമൂഹത്തിന് മാതൃകയായത്.
സഹോദരങ്ങളായ റിസ്‌വാന്റെയും ഷൈമയുടെയും ഇളയ സഹോദരനായ ആറുവയസ്സുകാരന്‍ റാഹിദ് പഠിക്കുന്ന പൂങ്ങോട് സര്‍ക്കാര്‍ സ്‌കൂളിനാണ് ഇരുവരും കല്യാണസമ്മാനം നല്‍കിയത്. സാമ്പത്തികപ്രയാസംകൊണ്ട് സ്‌കൂളില്‍ നടപ്പാകാതിരുന്ന കംപ്യൂട്ടര്‍ ലാബാണ് സഹോദരങ്ങളായ റിസ്‌വാനും ഷൈമയും ചേര്‍ന്ന് യാഥാര്‍ഥ്യമാക്കിയത്.
കംപ്യൂട്ടര്‍ സജ്ജീകരിക്കുന്നതിനുള്ള ഫണ്ട് കല്യാണപ്പന്തലില്‍ വെച്ച് എ പി അനില്‍കുമാറിന് റിസ്‌വാനും ഷൈമയും പിതാവ് റഷീദും ചേര്‍ന്ന് കൈമാറി. സ്‌കൂള്‍ പ്രഥമാധ്യാപിക ലിസി കുര്യന്‍, എസ്.എം.സി. ചെയര്‍മാന്‍ സവാദ്, പാലോളി റിയാസ്ബാബു തുടങ്ങിയവര്‍ പങ്കെടുത്തു.
പൂങ്ങോടിലെ ഒരുമ കൂട്ടായ്മയുടെ കീഴില്‍ വാങ്ങിക്കുന്ന ആംബുലന്‍സിനുള്ള സാമ്പത്തികസഹായവും നീലേങ്ങാടന്‍ റഷീദ് ചടങ്ങില്‍ കൈമാറി. പൂങ്ങോടിലെ നീലേങ്ങാടന്‍ റഷീദിന്റെയും റസീനയുടെയും മക്കളാണ് റിസ്‌വാനും ഷൈമയും റാഹിദും. പുളിക്കലോടിയിലെ ഹനീനയാണ് റിസ്‌വാന്റെ വധു. മമ്പാടിലെ പത്തായക്കോടന്‍ അഫ്‌സലാണ് ഷൈമയുടെ വരന്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates