കൊല്ലം: അഞ്ചാലുംമൂട് അഷ്ടമുടി കായലില്‍ ചെമ്മക്കാട് ഭാഗത്ത് കണ്ട വസ്തു ബോംബ് ആണെന്ന സംശയം പരിഭ്രാന്തി പരത്തി. വിദഗ്ധ പരിശോധനയില്‍ വാട്ടര്‍ ടാങ്കിലും മത്സ്യബന്ധന ബോട്ടിലും ഉപയോഗിക്കുന്ന വാല്‍വ് ആണെന്ന് കണ്ടെത്തിയതോടെയാണ് ആശ്വാസമായത്.

ചെമ്മക്കാട് എകെജി ക്ലബ്ബിന് സമീപം കായലില്‍ ബുധനാഴ്ച വൈകീട്ട് ചൂണ്ടയിട്ടിരുന്നയാളാണ് കായലില്‍ ലോഹനിര്‍മിത വസ്തു കണ്ടത്. 
കൊല്ലത്തുനിന്ന് ഡോഗ് സ്‌ക്വാഡും ബോംബ് സ്‌ക്വാഡും എത്തി പരിശോധന നടത്തിയെങ്കിലും ബോംബ് ആണോ എന്ന് മനസ്സിലാക്കാന്‍ കഴിഞ്ഞില്ല. 
വിദഗ്ദ്ധ പരിശോധനയ്ക്കായി വസ്തു പ്രത്യേക പെട്ടിയിലാക്കി അഞ്ചാലുംമൂട് സ്‌റ്റേഷന്‍ പരിസരത്തേക്ക് മാറ്റി. തുടര്‍ന്ന് നടത്തിയ പരിശോധനയിലാണ് ഇത് വാല്‍വാണെന്ന് കണ്ടെത്തിയത്.