കൊച്ചി : കൊച്ചിയില്‍ സിപിഐ പ്രവര്‍ത്തകരുടെ ഡിഐജി ഓഫീസ് മാര്‍ച്ചിനിടെയുണ്ടായ പൊലീസ് ലാത്തിച്ചാര്‍ജില്‍ എല്‍ദോ എബ്രഹാം എംഎല്‍എയുടെ കൈ ഒടിഞ്ഞെന്ന വാദം പൊളിയുന്നതായി റിപ്പോര്‍ട്ട്. സംഘര്‍ഷത്തിലും പൊലീസ് ലാത്തിച്ചാര്‍ജിലും എംഎല്‍എയുടെ ഇടതുകൈ ഒടിഞ്ഞെന്നായിരുന്നു റിപ്പോര്‍ട്ടുകള്‍. തുടര്‍ന്ന് ഇടതു കൈ പ്ലാസ്റ്ററിട്ടുകൊണ്ടുള്ള ചിത്രങ്ങളും പുറത്തുവന്നിരുന്നു.
എന്നാല്‍ എംഎല്‍എയുടെ കൈക്ക് ഒടിവില്ലെന്നാണ് മെഡിക്കല്‍ റിപ്പോര്‍ട്ടെന്നാണ് സൂചന. എംഎല്‍എയുടെ കൈയുടെ എല്ലിന് ഏതെങ്കിലും തരത്തില്‍ ഒടിവോ, പൊട്ടലോ ഉള്ളതായി മെഡിക്കല്‍ റിപ്പോര്‍ട്ടില്‍ ഇല്ലെന്നാണ് വാര്‍ത്തകള്‍. മെഡിക്കല്‍ റിപ്പോര്‍ട്ട് ജില്ലാ കളക്ടര്‍ക്ക് കൈമാറി. പൊലീസുകാരുടെ കൈക്കും ഒടിവില്ലെന്നാണ് റിപ്പോര്‍ട്ടിലുള്ളതെന്നാണ് സൂചന. അതേസമയം എംഎല്‍എയുടെ കൈയുടെ പരിക്കില്‍ അന്വേഷണം വേണമെന്ന് പൊലീസ് ആവശ്യപ്പെട്ടിട്ടുണ്ട്.
പൊലീസ് ലാത്തിച്ചാര്‍ജുമായി ബന്ധപ്പെട്ട് കളക്ടര്‍ ഇന്നലെ എംഎല്‍എ ജനപ്രതിനിധികള്‍, സിപിഐ പ്രവര്‍ത്തകര്‍, പൊലീസ് ഉദ്യോഗസ്ഥര്‍ എന്നിവരില്‍ നിന്നെല്ലാം ഇന്നലെ മൊഴിയെടുത്തിരുന്നു. വിശദമായ അന്വേഷണ റിപ്പോര്‍ട്ട് കളക്ടര്‍ തിങ്കളാഴ്ച മുഖ്യമന്ത്രിക്ക് കൈമാറിയേക്കും. പൊലീസ് ലാത്തിച്ചാര്‍ജിനെച്ചൊല്ലി സിപിഐയിലും ഭിന്നത തുടരുകയാണ്. ലാത്തിച്ചാര്‍ജിനെ തള്ളിപ്പറയാത്ത സിപിഐ സംസ്ഥാന സെക്രട്ടറി കാനം രാജേന്ദ്രന്റെ നിലപാടിനെതിരെ പാര്‍ട്ടിക്കുള്ളില്‍ പ്രതിഷേധം ഉയര്‍ന്നിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates