കൊച്ചി: ഒരുമിച്ചിരുന്നു മദ്യപിച്ച ശേഷം ബൈക്കില്‍ കയറ്റിക്കൊണ്ടുപോവാന്‍ വിസമ്മതിച്ച യുവാവിനെ ബിയര്‍ കുപ്പി കൊണ്ടു കുത്തിക്കൊലപ്പെടുത്താന്‍ ശ്രമിച്ചയാള്‍ പിടിയില്‍. നിലമ്പൂര്‍ ചന്തകുണം പഴംകുളത്ത് ഹാഷിം എന്ന ഇരുപത്തിയേഴുകാരനാണ് പൊലീസിന്റെ പിടിയിലായത്. വയനാട് സ്വദേശി സാദിഖിനാണ് കുത്തേറ്റത്.

കഴിഞ്ഞ ഇരുപത്തിമൂന്നിന് രാത്രി കൊച്ചി പടമുകള്‍ ജങ്ഷനിലാണ് സംഭവമുണ്ടായത്. ബിയര്‍ പാര്‍ലറില്‍ ഒരുമിച്ചിരുന്നു മദ്യപിച്ച ശേഷം മടങ്ങാനൊരുങ്ങുമ്പോള്‍ തന്നെയും ബൈക്കില്‍ കൊണ്ടുപോവണമെന്ന് സാദിഖിനോട് ഹാഷിം ആവശ്യപ്പെടുകയായിരുന്നു. എന്നാല്‍ ഹാഷിമിനെ ഒപ്പം കൂട്ടാന്‍  സാദിഖ് തയാറായില്ല. ഇതില്‍ പ്രകോപിതനായ ഹാഷിം ബിയര്‍ കുപ്പി കൊണ്ട് സാദിഖിനെ കുത്തുകയായിരുന്നുവെന്ന് പൊലീസ് പറഞ്ഞു.

കയ്യിലുണ്ടായിരുന്ന ബിയര്‍ കുപ്പി ഇയാള്‍ സാദിഖിന്റെ തലയില്‍ അടിക്കുകയും പൊട്ടിയ കുപ്പി വയറ്റില്‍ കുത്തിയിറക്കുകയുമായിരുന്നു. സാദിഖ് ചികിത്സയിലാണ്. 

സംഭവത്തിനു ശേഷം ഒളിവില്‍ പോയ ഹാഷിമിനെ നിലമ്പൂരില്‍നിന്നാണ് പൊലീസ് അറസ്റ്റ് ചെയ്തത്.