തൊടുപുഴ: വാടകവീട്ടില്‍ കഴിയുന്ന യുവാവിന് കാരുണ്യ ലോട്ടറിയില്‍ ഒന്നാം സമ്മാനം. കഴിഞ്ഞ ദിവസം നറുക്കെടുത്ത കാരുണ്യ ഭാഗ്യക്കുറിയുടെ രൂപത്തിലാണ് ഭാഗ്യം എത്തിയത്. ഇടുക്കി സ്വദേശിയായ ധനൂപ് എ.മോഹനെ തേടിയാണ് കാരുണ്യയുടെ 80 ലക്ഷം രൂപ എത്തിയത്. 

ഇടുക്കി അണക്കര ആഞ്ഞിലിമൂട്ടില്‍ എ എസ് മോഹനന്‍ - ലീലാമണി ദമ്പതികളുടെ മകനാണ് ധനൂപ്. അണക്കര മോണ്ട്‌ഫോര്‍ട്ട് സ്‌കൂളിലെ ഓഫീസ് ജീവനക്കാരനായ ധനൂപ് പതിവായി ലോട്ടറി  എടുക്കുന്നയാളാണ്. എന്നാല്‍ ഇതുവരെയും കാര്യമായ സമ്മാനമൊന്നും ധനൂപിന് ലഭിച്ചിരുന്നില്ല. 

മറ്റുള്ളവയ്‌ക്കൊപ്പം ഈ രീതിയിലും കടബാധ്യത ഏറിയെങ്കിലും പ്രതീക്ഷ കൈവിടാതെ ധനൂപ് ലോട്ടറി എടുത്തുകൊണ്ടേ ഇരുന്നു. കൂലിപ്പണിക്കാരനായിരുന്ന  അച്ഛന്‍ മോഹനന്‍ ഇപ്പോള്‍ രോഗബാധിതനാണ്. ലീലാമണി അങ്കണവാടി അധ്യാപികയായിരുന്നു. സ്വന്തമായൊരു വീടാണ് ധനൂപിന്റെ വലിയ ആഗ്രഹം.