കണ്ണൂര്‍:  കണ്ണൂരില്‍ എസ്ഡിപിഐ പ്രവര്‍ത്തകന്‍ വെട്ടേറ്റ് മരിച്ചു. കണ്ണവം സ്വദേശി സെയ്ദ് മുഹമ്മദ് സലാഹുദ്ദീനാണ് (30) മരിച്ചത്. എബിവിപി പ്രവര്‍ത്തകനായിരുന്ന ശ്യാമപ്രസാദ് വധക്കേസിലെ ഏഴാം പ്രതിയാണ്.

ഇന്ന് ഉച്ചയോടെയാണ് സംഭവം. കാറില്‍ വരികയായിരുന്നു സലാഹുദ്ദീന്‍. ബൈക്കില്‍ പിന്തുടര്‍ന്ന സംഘമാണ് ആക്രമണം നടത്തിയത്. അക്രമി സംഘം ബൈക്ക് ഉപയോഗിച്ച് കാറില്‍ ഇടിപ്പിച്ചു. കാര്‍ നിര്‍ത്തി പുറത്തിറങ്ങിയ സലാഹുദ്ദീനെ അക്രമി സംഘം വെട്ടുകയായിരുന്നുവെന്നാണ് പൊലീസ് പറയുന്നത്. ഉടനെ തന്നെ തലശേരി സഹകരണ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം തലശേരി ജനറല്‍ ആശുപത്രിയിലേക്ക് മാറ്റി.

2018 ജനുവരിയില്‍ കണ്ണവത്ത് വച്ചാണ് എബിവിപി പ്രവര്‍ത്തകനായിരുന്ന ശ്യാമപ്രസാദിനെ കൊലപ്പെടുത്തിയത്. കേസില്‍ ഏഴാം പ്രതിയായ സലാഹുദ്ദീന്‍ മട്ടന്നൂര്‍ കോടതിയില്‍ കീഴടങ്ങുകയായിരുന്നു. തുടര്‍ന്ന്് കേസില്‍ ജാമ്യത്തില്‍ കഴിയവേയാണ് സംഭവം.