കൊച്ചി: വിമാനത്താവളത്തിലേക്ക് കുറഞ്ഞ നിരക്കിൽ ടാക്സി സർവീസ് ലഭ്യമാക്കുന്ന ഓൺലൈൻ സേവനത്തിന് തുടക്കമാകുന്നു. എയർപോർട്ട് ടാക്സി സഹകരണ സംഘം വികസിപ്പിച്ച സിയ ടോക്സ് (സിഐഎ ടിഒസിഎസ്) എന്ന ആപ്പ് വഴിയാണ് സേവനം ലഭ്യമാകുക. നിലവിൽ പരീക്ഷണാടിസ്ഥാനത്തിൽ നടക്കുന്ന സംവിധാനം വൈകാതെ പൂർണസജ്ജമാകും. 

കിലോമീറ്ററിന് 10 രൂപ നിരക്കിലാണ് സർവീസുകൾ നടത്തുക. പ്ലേസ്റ്റോറിൽ നിന്ന് ഡൗൺലോഡ് ചെയ്യാവുന്ന ആപ്പിൽ വിമാനത്താവളത്തിൽ നിന്ന് വിവിധ സ്ഥലങ്ങളിലേക്ക് യാത്രക്കാരുമായി പോയി മടങ്ങുന്ന വാഹനങ്ങളുടെ വിവരങ്ങൾ 24 മണിക്കൂറും ലഭ്യമാണ്. തങ്ങളുടെ പ്രദേശത്തു കൂടെ കടന്നു പോകുന്ന ടാക്സികൾ കണ്ടെത്തി ആവശ്യക്കാർക്ക് ഉപയോഗിക്കാനാകും. 

നിലവിൽ 562ഒളം ടാക്സികളാണ് വിമാനത്താവളത്തിൽ പ്രീപെയ്ഡ് ആയി സർവീസ് നടത്തുന്നത്. മടക്കയാത്രയിൽ ഈ ടാക്സികളിൽ യാത്രക്കാരെ ലഭ്യമാക്കാൻ ലക്ഷ്യമിട്ടാണ് പുതിയ ഓൺലൈൻ ആപ്പ് വികസിപ്പിച്ചിരിക്കുന്നത്.