തിരുവനന്തപുരം: സംസ്ഥാനത്ത് ക്രിമിനൽ പ്രവർത്തനം തടയുന്നതിന് എല്ലാ ജില്ലകളിലും ക്രൈം സ്ക്വാഡുകൾ രൂപീകരിക്കുന്നു. കുറ്റകൃത്യങ്ങൾ ഉണ്ടായാൽ അതിനു പിന്നിൽ പ്രവർത്തിച്ചവരെ എത്രയും പെട്ടെന്ന് പിടികൂടാൻ ജില്ലാ പൊലീസ് മേധാവിമാർ ഉടനടി നടപടി സ്വീകരിക്കും.

സംസ്ഥാന പൊലീസ് മേധാവി ലോക്നാഥ് ബെഹ്റയാണ് ഇക്കാര്യം സംബന്ധിച്ച നിർദ്ദേശം നൽകിയത്. കൺട്രോൾ റൂം വാഹനങ്ങൾ, ഹൈവേ പൊലീസ്, പൊലീസ് സ്റ്റേഷൻ പട്രോൾ എന്നിവയ്ക്ക് ഇക്കാര്യത്തിൽ അവശ്യമായ നിർദ്ദേശങ്ങൾ നൽകാനും സംസ്ഥാന പൊലീസ് മേധാവി ആവശ്യപ്പെട്ടു.

നേരത്തെ, നിരവധി പൊലീസ് ആപ്പുകളുടെ സേവനം ഒറ്റ കുടക്കീഴിൽ കൊണ്ടുവരുന്ന പൊൽ- ആപ്പ് പ്രവർത്തനം തുടങ്ങിയിരുന്നു. ഇതിന് പിന്നാലെയാണ് സ്ക്വാഡുകൾ രൂപീകരിച്ചത്. പൊൽ- ആപ്പ് വഴി പൊലീസിൻറെ 27 തരം സേവനങ്ങൾ ആദ്യഘട്ടത്തിൽ ലഭ്യമാണ്. രണ്ടാം ഘട്ടത്തിൽ 15 ഓൺലൈൻ സേവങ്ങൾ കൂടി ആപ്പിൽ വരും. കോവിഡ് കാലമായതിനാൽ പൊലീസ് സ്റ്റേഷനുകളിലേക്ക് ജനങ്ങൾ എത്തേണ്ട സാഹചര്യം പരമാവധി ഒഴിവാക്കണമെന്നാണ് പൊലീസിന്റെ അഭ്യർത്ഥന.